యత్ స్థో దీర్ఘప్రసద్మని యద్ వాదో రోచనే దివః |
యద్ వా సముద్రే అధ్య్ ఆకృతే గృహే ऽత ఆ యాతమ్ అశ్వినా || 8-010-01
యద్ వా యజ్ఞమ్ మనవే సమ్మిమిక్షథుర్ ఏవేత్ కాణ్వస్య బోధతమ్ |
బృహస్పతిం విశ్వాన్ దేవాఅహం హువ ఇన్ద్రావిష్ణూ అశ్వినావ్ ఆశుహేషసా || 8-010-02
త్యా న్వ్ అశ్వినా హువే సుదంససా గృభే కృతా |
యయోర్ అస్తి ప్ర ణః సఖ్యం దేవేష్వ్ అధ్య్ ఆప్యమ్ || 8-010-03
యయోర్ అధి ప్ర యజ్ఞా అసూరే సన్తి సూరయః |
తా యజ్ఞస్యాధ్వరస్య ప్రచేతసా స్వధాభిర్ యా పిబతః సోమ్యమ్ మధు || 8-010-04
యద్ అద్యాశ్వినావ్ అపాగ్ యత్ ప్రాక్ స్థో వాజినీవసూ |
యద్ ద్రుహ్యవ్య్ అనవి తుర్వశే యదౌ హువే వామ్ అథ మా గతమ్ || 8-010-05
యద్ అన్తరిక్షే పతథః పురుభుజా యద్ వేమే రోదసీ అను |
యద్ వా స్వధాభిర్ అధితిష్ఠథో రథమ్ అత ఆ యాతమ్ అశ్వినా || 8-010-06
