ప్ర బ్రహ్మైతు సదనాద్ ఋతస్య వి రశ్మిభిః ససృజే సూర్యో గాః |
వి సానునా పృథివీ సస్ర ఉర్వీ పృథు ప్రతీకమ్ అధ్య్ ఏధే అగ్నిః || 7-036-01
ఇమాం వామ్ మిత్రావరుణా సువృక్తిమ్ ఇషం న కృణ్వే అసురా నవీయః |
ఇనో వామ్ అన్యః పదవీర్ అదబ్ధో జనం చ మిత్రో యతతి బ్రువాణః || 7-036-02
ఆ వాతస్య ధ్రజతో రన్త ఇత్యా అపీపయన్త ధేనవో న సూదాః |
మహో దివః సదనే జాయమానో ऽచిక్రదద్ వృషభః సస్మిన్న్ ఊధన్ || 7-036-03
గిరా య ఏతా యునజద్ ధరీ త ఇన్ద్ర ప్రియా సురథా శూర ధాయూ |
ప్ర యో మన్యుం రిరిక్షతో మినాత్య్ ఆ సుక్రతుమ్ అర్యమణం వవృత్యామ్ || 7-036-04
యజన్తే అస్య సఖ్యం వయశ్ చ నమస్వినః స్వ ఋతస్య ధామన్ |
వి పృక్షో బాబధే నృభి స్తవాన ఇదం నమో రుద్రాయ ప్రేష్ఠమ్ || 7-036-05
ఆ యత్ సాకం యశసో వావశానాః సరస్వతీ సప్తథీ సిన్ధుమాతా |
యాః సుష్వయన్త సుదుఘాః సుధారా అభి స్వేన పయసా పీప్యానాః || 7-036-06
ఉత త్యే నో మరుతో మన్దసానా ధియం తోకం చ వాజినో ऽవన్తు |
మా నః పరి ఖ్యద్ అక్షరా చరన్త్య్ అవీవృధన్ యుజ్యం తే రయిం నః || 7-036-07
ప్ర వో మహీమ్ అరమతిం కృణుధ్వమ్ ప్ర పూషణం విదథ్యం న వీరమ్ |
భగం ధియో ऽవితారం నో అస్యాః సాతౌ వాజం రాతిషాచమ్ పురంధిమ్ || 7-036-08
అచ్ఛాయం వో మరుతః శ్లోక ఏత్వ్ అచ్ఛా విష్ణుం నిషిక్తపామ్ అవోభిః |
ఉత ప్రజాయై గృణతే వయో ధుర్ యూయమ్ పాత స్వస్తిభిః సదా నః || 7-036-09