యస్ తిగ్మశృఙ్గో వృషభో న భీమ ఏకః కృష్టీశ్ చ్యావయతి ప్ర విశ్వాః |
యః శశ్వతో అదాశుషో గయస్య ప్రయన్తాసి సుష్వితరాయ వేదః || 7-019-01
త్వం హ త్యద్ ఇన్ద్ర కుత్సమ్ ఆవః శుశ్రూషమాణస్ తన్వా సమర్యే |
దాసం యచ్ ఛుష్ణం కుయవం న్య్ అస్మా అరన్ధయ ఆర్జునేయాయ శిక్షన్ || 7-019-02
త్వం ధృష్ణో ధృషతా వీతహవ్యమ్ ప్రావో విశ్వాభిర్ ఊతిభిః సుదాసమ్ |
ప్ర పౌరుకుత్సిం త్రసదస్యుమ్ ఆవః క్షేత్రసాతా వృత్రహత్యేషు పూరుమ్ || 7-019-03
త్వం నృభిర్ నృమణో దేవవీతౌ భూరీణి వృత్రా హర్యశ్వ హంసి |
త్వం ని దస్యుం చుమురిం ధునిం చాస్వాపయో దభీతయే సుహన్తు || 7-019-04
తవ చ్యౌత్నాని వజ్రహస్త తాని నవ యత్ పురో నవతిం చ సద్యః |
నివేశనే శతతమావివేషీర్ అహఞ్ చ వృత్రం నముచిమ్ ఉతాహన్ || 7-019-05
సనా తా త ఇన్ద్ర భోజనాని రాతహవ్యాయ దాశుషే సుదాసే |
వృష్ణే తే హరీ వృషణా యునజ్మి వ్యన్తు బ్రహ్మాణి పురుశాక వాజమ్ || 7-019-06
మా తే అస్యాం సహసావన్ పరిష్టావ్ అఘాయ భూమ హరివః పరాదై |
త్రాయస్వ నో ऽవృకేభిర్ వరూథైస్ తవ ప్రియాసః సూరిషు స్యామ || 7-019-07
ప్రియాస ఇత్ తే మఘవన్న్ అభిష్టౌ నరో మదేమ శరణే సఖాయః |
ని తుర్వశం ని యాద్వం శిశీహ్య్ అతిథిగ్వాయ శంస్యం కరిష్యన్ || 7-019-08
సద్యశ్ చిన్ ను తే మఘవన్న్ అభిష్టౌ నరః శంసన్త్య్ ఉక్థశాస ఉక్థా |
యే తే హవేభిర్ వి పణీఅదాశన్న్ అస్మాన్ వృణీష్వ యుజ్యాయ తస్మై || 7-019-09
ఏతే స్తోమా నరాం నృతమ తుభ్యమ్ అస్మద్ర్యఞ్చో దదతో మఘాని |
తేషామ్ ఇన్ద్ర వృత్రహత్యే శివో భూః సఖా చ శూరో ऽవితా చ నృణామ్ || 7-019-10
నూ ఇన్ద్ర శూర స్తవమాన ఊతీ బ్రహ్మజూతస్ తన్వా వావృధస్వ |
ఉప నో వాజాన్ మిమీహ్య్ ఉప స్తీన్ యూయమ్ పాత స్వస్తిభిః సదా నః || 7-019-11
