య ఆనయత్ పరావతః సునీతీ తుర్వశం యదుమ్ |
ఇన్ద్రః స నో యువా సఖా || 6-045-01
అవిప్రే చిద్ వయో దధద్ అనాశునా చిద్ అర్వతా |
ఇన్ద్రో జేతా హితం ధనమ్ || 6-045-02
మహీర్ అస్య ప్రణీతయః పూర్వీర్ ఉత ప్రశస్తయః |
నాస్య క్షీయన్త ఊతయః || 6-045-03
సఖాయో బ్రహ్మవాహసే ऽర్చత ప్ర చ గాయత |
స హి నః ప్రమతిర్ మహీ || 6-045-04
త్వమ్ ఏకస్య వృత్రహన్న్ అవితా ద్వయోర్ అసి |
ఉతేదృశే యథా వయమ్ || 6-045-05
నయసీద్ వ్ అతి ద్విషః కృణోష్య్ ఉక్థశంసినః |
నృభిః సువీర ఉచ్యసే || 6-045-06
బ్రహ్మాణమ్ బ్రహ్మవాహసం గీర్భిః సఖాయమ్ ఋగ్మియమ్ |
గాం న దోహసే హువే|| 6-045-07
యస్య విశ్వాని హస్తయోర్ ఊచుర్ వసూని ని ద్వితా |
వీరస్య పృతనాషహః || 6-045-08
వి దృళ్హాని చిద్ అద్రివో జనానాం శచీపతే |
వృహ మాయా అనానత || 6-045-09
తమ్ ఉ త్వా సత్య సోమపా ఇన్ద్ర వాజానామ్ పతే |
అహూమహి శ్రవస్యవః || 6-045-10
తమ్ ఉ త్వా యః పురాసిథ యో వా నూనం హితే ధనే |
హవ్యః స శ్రుధీ హవమ్ || 6-045-11
ధీభిర్ అర్వద్భిర్ అర్వతో వాజాఇన్ద్ర శ్రవాయ్యాన్ |
త్వయా జేష్మ హితం ధనమ్ || 6-045-12
అభూర్ ఉ వీర గిర్వణో మహాఇన్ద్ర ధనే హితే |
భరే వితన్తసాయ్యః || 6-045-13
యా త ఊతిర్ అమిత్రహన్ మక్షూజవస్తమాసతి |
తయా నో హినుహీ రథమ్ || 6-045-14
స రథేన రథీతమో ऽస్మాకేనాభియుగ్వనా |
జేషి జిష్ణో హితం ధనమ్ || 6-045-15
య ఏక ఇత్ తమ్ ఉ ష్టుహి కృష్టీనాం విచర్షణిః |
పతిర్ జజ్ఞే వృషక్రతుః || 6-045-16
యో గృణతామ్ ఇద్ ఆసిథాపిర్ ఊతీ శివః సఖా |
స త్వం న ఇన్ద్ర మృళయ || 6-045-17
ధిష్వ వజ్రం గభస్త్యో రక్షోహత్యాయ వజ్రివః |
సాసహీష్ఠా అభి స్పృధః || 6-045-18
ప్రత్నం రయీణాం యుజం సఖాయం కీరిచోదనమ్ |
బ్రహ్మవాహస్తమం హువే || 6-045-19
స హి విశ్వాని పార్థివాఏకో వసూని పత్యతే |
గిర్వణస్తమో అధ్రిగుః || 6-045-20
స నో నియుద్భిర్ ఆ పృణ కామం వాజేభిర్ అశ్విభిః |
గోమద్భిర్ గోపతే ధృషత్ || 6-045-21
తద్ వో గాయ సుతే సచా పురుహూతాయ సత్వనే |
శం యద్ గవే న శాకినే || 6-045-22
న ఘా వసుర్ ని యమతే దానం వాజస్య గోమతః |
యత్ సీమ్ ఉప శ్రవద్ గిరః || 6-045-23
కువిత్సస్య ప్ర హి వ్రజం గోమన్తం దస్యుహా గమత్ |
శచీభిర్ అప నో వరత్ || 6-045-24
ఇమా ఉ త్వా శతక్రతో ऽభి ప్ర ణోనువుర్ గిరః |
ఇన్ద్ర వత్సం న మాతరః || 6-045-25
దూణాశం సఖ్యం తవ గౌర్ అసి వీర గవ్యతే |
అశ్వో అశ్వాయతే భవ || 6-045-26
స మన్దస్వా హ్య్ అన్ధసో రాధసే తన్వా మహే |
న స్తోతారం నిదే కరః || 6-045-27
ఇమా ఉ త్వా సుతే-సుతే నక్షన్తే గిర్వణో గిరః |
వత్సం గావో న ధేనవః || 6-045-28
పురూతమమ్ పురూణాం స్తోతౄణాం వివాచి |
వాజేభిర్ వాజయతామ్ || 6-045-29
అస్మాకమ్ ఇన్ద్ర భూతు తే స్తోమో వాహిష్ఠో అన్తమః |
అస్మాన్ రాయే మహే హిను || 6-045-30
అధి బృబుః పణీనాం వర్షిష్ఠే మూర్ధన్న్ అస్థాత్ |
ఉరుః కక్షో న గాఙ్గ్యః || 6-045-31
యస్య వాయోర్ ఇవ ద్రవద్ భద్రా రాతిః సహస్రిణీ |
సద్యో దానాయ మంహతే || 6-045-32
తత్ సు నో విశ్వే అర్య ఆ సదా గృణన్తి కారవః |
బృబుం సహస్రదాతమం సూరిం సహస్రసాతమమ్ || 6-045-33
