త్వమ్ అగ్నే యజ్ఞానాం హోతా విశ్వేషాం హితః |
దేవేభిర్ మానుషే జనే || 6-016-01
స నో మన్ద్రాభిర్ అధ్వరే జిహ్వాభిర్ యజా మహః |
ఆ దేవాన్ వక్షి యక్షి చ || 6-016-02
వేత్థా హి వేధో అధ్వనః పథశ్ చ దేవాఞ్జసా |
అగ్నే యజ్ఞేషు సుక్రతో || 6-016-03
త్వామ్ ఈళే అధ ద్వితా భరతో వాజిభిః శునమ్ |
ఈజే యజ్ఞేషు యజ్ఞియమ్ || 6-016-04
త్వమ్ ఇమా వార్యా పురు దివోదాసాయ సున్వతే |
భరద్వాజాయ దాశుషే || 6-016-05
త్వం దూతో అమర్త్య ఆ వహా దైవ్యం జనమ్ |
శృణ్వన్ విప్రస్య సుష్టుతిమ్ || 6-016-06
త్వామ్ అగ్నే స్వాధ్యో మర్తాసో దేవవీతయే |
యజ్ఞేషు దేవమ్ ఈళతే || 6-016-07
తవ ప్ర యక్షి సందృశమ్ ఉత క్రతుం సుదానవః |
విశ్వే జుషన్త కామినః || 6-016-08
త్వం హోతా మనుర్హితో వహ్నిర్ ఆసా విదుష్టరః |
అగ్నే యక్షి దివో విశః || 6-016-09
అగ్న ఆ యాహి వీతయే గృణానో హవ్యదాతయే |
ని హోతా సత్సి బర్హిషి || 6-016-10
తం త్వా సమిద్భిర్ అఙ్గిరో ఘృతేన వర్ధయామసి |
బృహచ్ ఛోచా యవిష్ఠ్య || 6-016-11
స నః పృథు శ్రవాయ్యమ్ అచ్ఛా దేవ వివాససి |
బృహద్ అగ్నే సువీర్యమ్ || 6-016-12
త్వామ్ అగ్నే పుష్కరాద్ అధ్య్ అథర్వా నిర్ అమన్థత |
మూర్ధ్నో విశ్వస్య వాఘతః || 6-016-13
తమ్ ఉ త్వా దధ్యఙ్ఙ్ ఋషిః పుత్ర ఈధే అథర్వణః |
వృత్రహణమ్ పురందరమ్ || 6-016-14
తమ్ ఉ త్వా పాథ్యో వృషా సమ్ ఈధే దస్యుహన్తమమ్ |
ధనంజయం రణే-రణే || 6-016-15
ఏహ్య్ ఊ షు బ్రవాణి తే ऽగ్న ఇత్థేతరా గిరః |
ఏభిర్ వర్ధాస ఇన్దుభిః || 6-016-16
యత్ర క్వ చ తే మనో దక్షం దధస ఉత్తరమ్ |
తత్రా సదః కృణవసే || 6-016-17
నహి తే పూర్తమ్ అక్షిపద్ భువన్ నేమానాం వసో |
అథా దువో వనవసే || 6-016-18
ఆగ్నిర్ అగామి భారతో వృత్రహా పురుచేతనః |
దివోదాసస్య సత్పతిః || 6-016-19
స హి విశ్వాతి పార్థివా రయిం దాశన్ మహిత్వనా |
వన్వన్న్ అవాతో అస్తృతః || 6-016-20
స ప్రత్నవన్ నవీయసాగ్నే ద్యుమ్నేన సంయతా |
బృహత్ తతన్థ భానునా || 6-016-21
ప్ర వః సఖాయో అగ్నయే స్తోమం యజ్ఞం చ ధృష్ణుయా |
అర్చ గాయ చ వేధసే || 6-016-22
స హి యో మానుషా యుగా సీదద్ ధోతా కవిక్రతుః |
దూతశ్ చ హవ్యవాహనః || 6-016-23
తా రాజానా శుచివ్రతాదిత్యాన్ మారుతం గణమ్ |
వసో యక్షీహ రోదసీ || 6-016-24
వస్వీ తే అగ్నే సందృష్టిర్ ఇషయతే మర్త్యాయ |
ఊర్జో నపాద్ అమృతస్య || 6-016-25
క్రత్వా దా అస్తు శ్రేష్ఠో ऽద్య త్వా వన్వన్ సురేక్ణాః |
మర్త ఆనాశ సువృక్తిమ్ || 6-016-26
తే తే అగ్నే త్వోతా ఇషయన్తో విశ్వమ్ ఆయుః |
తరన్తో అర్యో అరాతీర్ వన్వన్తో అర్యో అరాతీః || 6-016-27
అగ్నిస్ తిగ్మేన శోచిషా యాసద్ విశ్వం న్య్ అత్రిణమ్ |
అగ్నిర్ నో వనతే రయిమ్ || 6-016-28
సువీరం రయిమ్ ఆ భర జాతవేదో విచర్షణే |
జహి రక్షాంసి సుక్రతో || 6-016-29
త్వం నః పాహ్య్ అంహసో జాతవేదో అఘాయతః |
రక్షా ణో బ్రహ్మణస్ కవే || 6-016-30
యో నో అగ్నే దురేవ ఆ మర్తో వధాయ దాశతి |
తస్మాన్ నః పాహ్య్ అంహసః || 6-016-31
త్వం తం దేవ జిహ్వయా పరి బాధస్వ దుష్కృతమ్ |
మర్తో యో నో జిఘాంసతి || 6-016-32
భరద్వాజాయ సప్రథః శర్మ యచ్ఛ సహన్త్య |
అగ్నే వరేణ్యం వసు || 6-016-33
అగ్నిర్ వృత్రాణి జఙ్ఘనద్ ద్రవిణస్యుర్ విపన్యయా |
సమిద్ధః శుక్ర ఆహుతః || 6-016-34
గర్భే మాతుః పితుష్ పితా విదిద్యుతానో అక్షరే |
సీదన్న్ ఋతస్య యోనిమ్ ఆ || 6-016-35
బ్రహ్మ ప్రజావద్ ఆ భర జాతవేదో విచర్షణే |
అగ్నే యద్ దీదయద్ దివి || 6-016-36
ఉప త్వా రణ్వసందృశమ్ ప్రయస్వన్తః సహస్కృత |
అగ్నే ససృజ్మహే గిరః || 6-016-37
ఉప ఛాయామ్ ఇవ ఘృణేర్ అగన్మ శర్మ తే వయమ్ |
అగ్నే హిరణ్యసందృశః || 6-016-38
య ఉగ్ర ఇవ శర్యహా తిగ్మశృఙ్గో న వంసగః |
అగ్నే పురో రురోజిథ || 6-016-39
ఆ యం హస్తే న ఖాదినం శిశుం జాతం న బిభ్రతి |
విశామ్ అగ్నిం స్వధ్వరమ్ || 6-016-40
ప్ర దేవం దేవవీతయే భరతా వసువిత్తమమ్ |
ఆ స్వే యోనౌ ని షీదతు || 6-016-41
ఆ జాతం జాతవేదసి ప్రియం శిశీతాతిథిమ్ |
స్యోన ఆ గృహపతిమ్ || 6-016-42
అగ్నే యుక్ష్వా హి యే తవాశ్వాసో దేవ సాధవః |
అరం వహన్తి మన్యవే || 6-016-43
అచ్ఛా నో యాహ్య్ ఆ వహాభి ప్రయాంసి వీతయే |
ఆ దేవాన్ సోమపీతయే || 6-016-44
ఉద్ అగ్నే భారత ద్యుమద్ అజస్రేణ దవిద్యుతత్ |
శోచా వి భాహ్య్ అజర || 6-016-45
వీతీ యో దేవమ్ మర్తో దువస్యేద్ అగ్నిమ్ ఈళీతాధ్వరే హవిష్మాన్ |
హోతారం సత్యయజం రోదస్యోర్ ఉత్తానహస్తో నమసా వివాసేత్ || 6-016-46
ఆ తే అగ్న ఋచా హవిర్ హృదా తష్టమ్ భరామసి |
తే తే భవన్తూక్షణ ఋషభాసో వశా ఉత || 6-016-47
అగ్నిం దేవాసో అగ్రియమ్ ఇన్ధతే వృత్రహన్తమమ్ |
యేనా వసూన్య్ ఆభృతా తృళ్హా రక్షాంసి వాజినా || 6-016-48
