త్వామ్ అగ్నే హవిష్మన్తో దేవమ్ మర్తాస ఈళతే |
మన్యే త్వా జాతవేదసం స హవ్యా వక్ష్య్ ఆనుషక్ || 5-009-01
అగ్నిర్ హోతా దాస్వతః క్షయస్య వృక్తబర్హిషః |
సం యజ్ఞాసశ్ చరన్తి యం సం వాజాసః శ్రవస్యవః || 5-009-02
ఉత స్మ యం శిశుం యథా నవం జనిష్టారణీ |
ధర్తారమ్ మానుషీణాం విశామ్ అగ్నిం స్వధ్వరమ్ || 5-009-03
ఉత స్మ దుర్గృభీయసే పుత్రో న హ్వార్యాణామ్ |
పురూ యో దగ్ధాసి వనాగ్నే పశుర్ న యవసే || 5-009-04
అధ స్మ యస్యార్చయః సమ్యక్ సంయన్తి ధూమినః |
యద్ ఈమ్ అహ త్రితో దివ్య్ ఉప ధ్మాతేవ ధమతి శిశీతే ధ్మాతరీ యథా || 5-009-05
తవాహమ్ అగ్న ఊతిభిర్ మిత్రస్య చ ప్రశస్తిభిః |
ద్వేషోయుతో న దురితా తుర్యామ మర్త్యానామ్ || 5-009-06
తం నో అగ్నే అభీ నరో రయిం సహస్వ ఆ భర |
స క్షేపయత్ స పోషయద్ భువద్ వాజస్య సాతయ ఉతైధి పృత్సు నో వృధే || 5-009-07
