అజాతశత్రుమ్ అజరా స్వర్వత్య్ అను స్వధామితా దస్మమ్ ఈయతే |
సునోతన పచత బ్రహ్మవాహసే పురుష్టుతాయ ప్రతరం దధాతన || 5-034-01
ఆ యః సోమేన జఠరమ్ అపిప్రతామన్దత మఘవా మధ్వో అన్ధసః |
యద్ ఈమ్ మృగాయ హన్తవే మహావధః సహస్రభృష్టిమ్ ఉశనా వధం యమత్ || 5-034-02
యో అస్మై ఘ్రంస ఉత వా య ఊధని సోమం సునోతి భవతి ద్యుమాఅహ |
అపాప శక్రస్ తతనుష్టిమ్ ఊహతి తనూశుభ్రమ్ మఘవా యః కవాసఖః || 5-034-03
యస్యావధీత్ పితరం యస్య మాతరం యస్య శక్రో భ్రాతరం నాత ఈషతే |
వేతీద్ వ్ అస్య ప్రయతా యతంకరో న కిల్బిషాద్ ఈషతే వస్వ ఆకరః || 5-034-04
న పఞ్చభిర్ దశభిర్ వష్ట్య్ ఆరభం నాసున్వతా సచతే పుష్యతా చన |
జినాతి వేద్ అముయా హన్తి వా ధునిర్ ఆ దేవయుమ్ భజతి గోమతి వ్రజే || 5-034-05
విత్వక్షణః సమృతౌ చక్రమాసజో ऽసున్వతో విషుణః సున్వతో వృధః |
ఇన్ద్రో విశ్వస్య దమితా విభీషణో యథావశం నయతి దాసమ్ ఆర్యః || 5-034-06
సమ్ ఈమ్ పణేర్ అజతి భోజనమ్ ముషే వి దాశుషే భజతి సూనరం వసు |
దుర్గే చన ధ్రియతే విశ్వ ఆ పురు జనో యో అస్య తవిషీమ్ అచుక్రుధత్ || 5-034-07
సం యజ్ జనౌ సుధనౌ విశ్వశర్ధసావ్ అవేద్ ఇన్ద్రో మఘవా గోషు శుభ్రిషు |
యుజం హ్య్ అన్యమ్ అకృత ప్రవేపన్య్ ఉద్ ఈం గవ్యం సృజతే సత్వభిర్ ధునిః || 5-034-08
సహస్రసామ్ ఆగ్నివేశిం గృణీషే శత్రిమ్ అగ్న ఉపమాం కేతుమ్ అర్యః |
తస్మా ఆపః సంయతః పీపయన్త తస్మిన్ క్షత్రమ్ అమవత్ త్వేషమ్ అస్తు || 5-034-09
