ఉప నో వాజా అధ్వరమ్ ఋభుక్షా దేవా యాత పథిభిర్ దేవయానైః |
యథా యజ్ఞమ్ మనుషో విక్ష్వ్ ఆసు దధిధ్వే రణ్వాః సుదినేష్వ్ అహ్నామ్ || 4-037-01
తే వో హృదే మనసే సన్తు యజ్ఞా జుష్టాసో అద్య ఘృతనిర్ణిజో గుః |
ప్ర వః సుతాసో హరయన్త పూర్ణాః క్రత్వే దక్షాయ హర్షయన్త పీతాః || 4-037-02
త్ర్యుదాయం దేవహితం యథా వ స్తోమో వాజా ఋభుక్షణో దదే వః |
జుహ్వే మనుష్వద్ ఉపరాసు విక్షు యుష్మే సచా బృహద్దివేషు సోమమ్ || 4-037-03
పీవోశ్వాః శుచద్రథా హి భూతాయఃశిప్రా వాజినః సునిష్కాః |
ఇన్ద్రస్య సూనో శవసో నపాతో ऽను వశ్ చేత్య్ అగ్రియమ్ మదాయ || 4-037-04
ఋభుమ్ ఋభుక్షణో రయిం వాజే వాజిన్తమం యుజమ్ |
ఇన్ద్రస్వన్తం హవామహే సదాసాతమమ్ అశ్వినమ్ || 4-037-05
సేద్ ఋభవో యమ్ అవథ యూయమ్ ఇన్ద్రశ్ చ మర్త్యమ్ |
స ధీభిర్ అస్తు సనితా మేధసాతా సో అర్వతా || 4-037-06
వి నో వాజా ఋభుక్షణః పథశ్ చితన యష్టవే |
అస్మభ్యం సూరయ స్తుతా విశ్వా ఆశాస్ తరీషణి || 4-037-07
తం నో వాజా ఋభుక్షణ ఇన్ద్ర నాసత్యా రయిమ్ |
సమ్ అశ్వం చర్షణిభ్య ఆ పురు శస్త మఘత్తయే || 4-037-08
