ఋభుర్ విభ్వా వాజ ఇన్ద్రో నో అచ్ఛేమం యజ్ఞం రత్నధేయోప యాత |
ఇదా హి వో ధిషణా దేవ్య్ అహ్నామ్ అధాత్ పీతిం సమ్ మదా అగ్మతా వః || 4-034-01
విదానాసో జన్మనో వాజరత్నా ఉత ఋతుభిర్ ఋభవో మాదయధ్వమ్ |
సం వో మదా అగ్మత సమ్ పురంధిః సువీరామ్ అస్మే రయిమ్ ఏరయధ్వమ్ || 4-034-02
అయం వో యజ్ఞ ఋభవో ऽకారి యమ్ ఆ మనుష్వత్ ప్రదివో దధిధ్వే |
ప్ర వో ऽచ్ఛా జుజుషాణాసో అస్థుర్ అభూత విశ్వే అగ్రియోత వాజాః || 4-034-03
అభూద్ ఉ వో విధతే రత్నధేయమ్ ఇదా నరో దాశుషే మర్త్యాయ |
పిబత వాజా ఋభవో దదే వో మహి తృతీయం సవనమ్ మదాయ || 4-034-04
ఆ వాజా యాతోప న ఋభుక్షా మహో నరో ద్రవిణసో గృణానాః |
ఆ వః పీతయో ऽభిపిత్వే అహ్నామ్ ఇమా అస్తం నవస్వ ఇవ గ్మన్ || 4-034-05
ఆ నపాతః శవసో యాతనోపేమం యజ్ఞం నమసా హూయమానాః |
సజోషసః సూరయో యస్య చ స్థ మధ్వః పాత రత్నధా ఇన్ద్రవన్తః || 4-034-06
సజోషా ఇన్ద్ర వరుణేన సోమం సజోషాః పాహి గిర్వణో మరుద్భిః |
అగ్రేపాభిర్ ఋతుపాభిః సజోషా గ్నాస్పత్నీభీ రత్నధాభిః సజోషాః || 4-034-07
సజోషస ఆదిత్యైర్ మాదయధ్వం సజోషస ఋభవః పర్వతేభిః |
సజోషసో దైవ్యేనా సవిత్రా సజోషసః సిన్ధుభీ రత్నధేభిః || 4-034-08
యే అశ్వినా యే పితరా య ఊతీ ధేనుం తతక్షుర్ ఋభవో యే అశ్వా |
యే అంసత్రా య ఋధగ్ రోదసీ యే విభ్వో నరః స్వపత్యాని చక్రుః || 4-034-09
యే గోమన్తం వాజవన్తం సువీరం రయిం ధత్థ వసుమన్తమ్ పురుక్షుమ్ |
తే అగ్రేపా ఋభవో మన్దసానా అస్మే ధత్త యే చ రాతిం గృణన్తి || 4-034-10
నాపాభూత న వో ऽతీతృషామానిఃశస్తా ఋభవో యజ్ఞే అస్మిన్ |
సమ్ ఇన్ద్రేణ మదథ సమ్ మరుద్భిః సం రాజభీ రత్నధేయాయ దేవాః || 4-034-11
