కథా మహామ్ అవృధత్ కస్య హోతుర్ యజ్ఞం జుషాణో అభి సోమమ్ ఊధః |
పిబన్న్ ఉశానో జుషమాణో అన్ధో వవక్ష ఋష్వః శుచతే ధనాయ || 4-023-01
కో అస్య వీరః సధమాదమ్ ఆప సమ్ ఆనంశ సుమతిభిః కో అస్య |
కద్ అస్య చిత్రం చికితే కద్ ఊతీ వృధే భువచ్ ఛశమానస్య యజ్యోః || 4-023-02
కథా శృణోతి హూయమానమ్ ఇన్ద్రః కథా శృణ్వన్న్ అవసామ్ అస్య వేద |
కా అస్య పూర్వీర్ ఉపమాతయో హ కథైనమ్ ఆహుః పపురిం జరిత్రే || 4-023-03
కథా సబాధః శశమానో అస్య నశద్ అభి ద్రవిణం దీధ్యానః |
దేవో భువన్ నవేదా మ ఋతానాం నమో జగృభ్వాఅభి యజ్ జుజోషత్ || 4-023-04
కథా కద్ అస్యా ఉషసో వ్యుష్టౌ దేవో మర్తస్య సఖ్యం జుజోష |
కథా కద్ అస్య సఖ్యం సఖిభ్యో యే అస్మిన్ కామం సుయుజం తతస్రే || 4-023-05
కిమ్ ఆద్ అమత్రం సఖ్యం సఖిభ్యః కదా ను తే భ్రాత్రమ్ ప్ర బ్రవామ |
శ్రియే సుదృశో వపుర్ అస్య సర్గాః స్వర్ ణ చిత్రతమమ్ ఇష ఆ గోః || 4-023-06
ద్రుహం జిఘాంసన్ ధ్వరసమ్ అనిన్ద్రాం తేతిక్తే తిగ్మా తుజసే అనీకా |
ఋణా చిద్ యత్ర ఋణయా న ఉగ్రో దూరే అజ్ఞాతా ఉషసో బబాధే || 4-023-07
ఋతస్య హి శురుధః సన్తి పూర్వీర్ ఋతస్య ధీతిర్ వృజినాని హన్తి |
ఋతస్య శ్లోకో బధిరా తతర్ద కర్ణా బుధానః శుచమాన ఆయోః || 4-023-08
ఋతస్య దృళ్హా ధరుణాని సన్తి పురూణి చన్ద్రా వపుషే వపూంషి |
ఋతేన దీర్ఘమ్ ఇషణన్త పృక్ష ఋతేన గావ ఋతమ్ ఆ వివేశుః || 4-023-09
ఋతం యేమాన ఋతమ్ ఇద్ వనోత్య్ ఋతస్య శుష్మస్ తురయా ఉ గవ్యుః |
ఋతాయ పృథ్వీ బహులే గభీరే ఋతాయ ధేనూ పరమే దుహాతే || 4-023-10
నూ ష్టుత ఇన్ద్ర నూ గృణాన ఇషం జరిత్రే నద్యో న పీపేః |
అకారి తే హరివో బ్రహ్మ నవ్యం ధియా స్యామ రథ్యః సదాసాః || 4-023-11