ధానావన్తం కరమ్భిణమ్ అపూపవన్తమ్ ఉక్థినమ్ |
ఇన్ద్ర ప్రాతర్ జుషస్వ నః || 3-052-01
పురోళాశమ్ పచత్యం జుషస్వేన్ద్రా గురస్వ చ |
తుభ్యం హవ్యాని సిస్రతే || 3-052-02
పురోళాశం చ నో ఘసో జోషయాసే గిరశ్ చ నః |
వధూయుర్ ఇవ యోషణామ్ || 3-052-03
పురోళాశం సనశ్రుత ప్రాతఃసావే జుషస్వ నః |
ఇన్ద్ర క్రతుర్ హి తే బృహన్ || 3-052-04
మాధ్యందినస్య సవనస్య ధానాః పురోళాశమ్ ఇన్ద్ర కృష్వేహ చారుమ్ |
ప్ర యత్ స్తోతా జరితా తూర్ణ్యర్థో వృషాయమాణ ఉప గీర్భిర్ ఈట్టే || 3-052-05
తృతీయే ధానాః సవనే పురుష్టుత పురోళాశమ్ ఆహుతమ్ మామహస్వ నః |
ఋభుమన్తం వాజవన్తం త్వా కవే ప్రయస్వన్త ఉప శిక్షేమ ధీతిభిః || 3-052-06
పూషణ్వతే తే చకృమా కరమ్భం హరివతే హర్యశ్వాయ ధానాః |
అపూపమ్ అద్ధి సగణో మరుద్భిః సోమమ్ పిబ వృత్రహా శూర విద్వాన్ || 3-052-07
ప్రతి ధానా భరత తూయమ్ అస్మై పురోళాశం వీరతమాయ నృణామ్ |
దివే-దివే సదృశీర్ ఇన్ద్ర తుభ్యం వర్ధన్తు త్వా సోమపేయాయ ధృష్ణో || 3-052-08
