ఉప నః సుతమ్ ఆ గహి సోమమ్ ఇన్ద్ర గవాశిరమ్ |
హరిభ్యాం యస్ తే అస్మయుః || 3-042-01
తమ్ ఇన్ద్ర మదమ్ ఆ గహి బర్హిష్ఠాం గ్రావభిః సుతమ్ |
కువిన్ న్వ్ అస్య తృప్ణవః || 3-042-02
ఇన్ద్రమ్ ఇత్థా గిరో మమాచ్ఛాగుర్ ఇషితా ఇతః |
ఆవృతే సోమపీతయే || 3-042-03
ఇన్ద్రం సోమస్య పీతయే స్తోమైర్ ఇహ హవామహే |
ఉక్థేభిః కువిద్ ఆగమత్ || 3-042-04
ఇన్ద్ర సోమాః సుతా ఇమే తాన్ దధిష్వ శతక్రతో |
జఠరే వాజినీవసో || 3-042-05
విద్మా హి త్వా ధనంజయం వాజేషు దధృషం కవే |
అధా తే సుమ్నమ్ ఈమహే || 3-042-06
ఇమమ్ ఇన్ద్ర గవాశిరం యవాశిరం చ నః పిబ |
ఆగత్యా వృషభిః సుతమ్ || 3-042-07
తుభ్యేద్ ఇన్ద్ర స్వ ఓక్యే సోమం చోదామి పీతయే |
ఏష రారన్తు తే హృది || 3-042-08
త్వాం సుతస్య పీతయే ప్రత్నమ్ ఇన్ద్ర హవామహే |
కుశికాసో అవస్యవః || 3-042-09
