ఇన్ద్ర త్వా వృషభం వయం సుతే సోమే హవామహే |
స పాహి మధ్వో అన్ధసః || 3-040-01
ఇన్ద్ర క్రతువిదం సుతం సోమం హర్య పురుష్టుత |
పిబా వృషస్వ తాతృపిమ్ || 3-040-02
ఇన్ద్ర ప్ర ణో ధితావానం యజ్ఞం విశ్వేభిర్ దేవేభిః |
తిర స్తవాన విశ్పతే || 3-040-03
ఇన్ద్ర సోమాః సుతా ఇమే తవ ప్ర యన్తి సత్పతే |
క్షయం చన్ద్రాస ఇన్దవః || 3-040-04
దధిష్వా జఠరే సుతం సోమమ్ ఇన్ద్ర వరేణ్యమ్ |
తవ ద్యుక్షాస ఇన్దవః || 3-040-05
గిర్వణః పాహి నః సుతమ్ మధోర్ ధారాభిర్ అజ్యసే |
ఇన్ద్ర త్వాదాతమ్ ఇద్ యశః || 3-040-06
అభి ద్యుమ్నాని వనిన ఇన్ద్రం సచన్తే అక్షితా |
పీత్వీ సోమస్య వావృధే || 3-040-07
అర్వావతో న ఆ గహి పరావతశ్ చ వృత్రహన్ |
ఇమా జుషస్వ నో గిరః || 3-040-08
యద్ అన్తరా పరావతమ్ అర్వావతం చ హూయసే |
ఇన్ద్రేహ తత ఆ గహి || 3-040-09
