ప్ర వో దేవాయాగ్నయే బర్హిష్ఠమ్ అర్చాస్మై |
గమద్ దేవేభిర్ ఆ స నో యజిష్ఠో బర్హిర్ ఆ సదత్ || 3-013-01
ఋతావా యస్య రోదసీ దక్షం సచన్త ఊతయః |
హవిష్మన్తస్ తమ్ ఈళతే తం సనిష్యన్తో ऽవసే || 3-013-02
స యన్తా విప్ర ఏషాం స యజ్ఞానామ్ అథా హి షః |
అగ్నిం తం వో దువస్యత దాతా యో వనితా మఘమ్ || 3-013-03
స నః శర్మాణి వీతయే ऽగ్నిర్ యచ్ఛతు శంతమా |
యతో నః ప్రుష్ణవద్ వసు దివి క్షితిభ్యో అప్స్వ్ ఆ || 3-013-04
దీదివాంసమ్ అపూర్వ్యం వస్వీభిర్ అస్య ధీతిభిః |
ఋక్వాణో అగ్నిమ్ ఇన్ధతే హోతారం విశ్పతిం విశామ్ || 3-013-05
ఉత నో బ్రహ్మన్న్ అవిష ఉక్థేషు దేవహూతమః |
శం నః శోచా మరుద్వృధో ऽగ్నే సహస్రసాతమః || 3-013-06
నూ నో రాస్వ సహస్రవత్ తోకవత్ పుష్టిమద్ వసు |
ద్యుమద్ అగ్నే సువీర్యం వర్షిష్ఠమ్ అనుపక్షితమ్ || 3-013-07
