సోమాపూషణా జననా రయీణాం జననా దివో జననా పృథివ్యాః |
జాతౌ విశ్వస్య భువనస్య గోపౌ దేవా అకృణ్వన్న్ అమృతస్య నాభిమ్ || 2-040-01
ఇమౌ దేవౌ జాయమానౌ జుషన్తేమౌ తమాంసి గూహతామ్ అజుష్టా |
ఆభ్యామ్ ఇన్ద్రః పక్వమ్ ఆమాస్వ్ అన్తః సోమాపూషభ్యాం జనద్ ఉస్రియాసు || 2-040-02
సోమాపూషణా రజసో విమానం సప్తచక్రం రథమ్ అవిశ్వమిన్వమ్ |
విషూవృతమ్ మనసా యుజ్యమానం తం జిన్వథో వృషణా పఞ్చరశ్మిమ్ || 2-040-03
దివ్య్ అన్యః సదనం చక్ర ఉచ్చా పృథివ్యామ్ అన్యో అధ్య్ అన్తరిక్షే |
తావ్ అస్మభ్యమ్ పురువారమ్ పురుక్షుం రాయస్ పోషం వి ష్యతాం నాభిమ్ అస్మే || 2-040-04
విశ్వాన్య్ అన్యో భువనా జజాన విశ్వమ్ అన్యో అభిచక్షాణ ఏతి |
సోమాపూషణావ్ అవతం ధియమ్ మే యువాభ్యాం విశ్వాః పృతనా జయేమ || 2-040-05
ధియమ్ పూషా జిన్వతు విశ్వమిన్వో రయిం సోమో రయిపతిర్ దధాతు |
అవతు దేవ్య్ అదితిర్ అనర్వా బృహద్ వదేమ విదథే సువీరాః || 2-040-06
