ఇన్ధానో అగ్నిం వనవద్ వనుష్యతః కృతబ్రహ్మా శూశువద్ రాతహవ్య ఇత్ |
జాతేన జాతమ్ అతి స ప్ర సర్సృతే యం-యం యుజం కృణుతే బ్రహ్మణస్ పతిః || 2-025-01
వీరేభిర్ వీరాన్ వనవద్ వనుష్యతో గోభీ రయిమ్ పప్రథద్ బోధతి త్మనా |
తోకం చ తస్య తనయం చ వర్ధతే యం-యం యుజం కృణుతే బ్రహ్మణస్ పతిః || 2-025-02
సిన్ధుర్ న క్షోదః శిమీవాఋఘాయతో వృషేవ వధ్రీఅభి వష్ట్య్ ఓజసా |
అగ్నేర్ ఇవ ప్రసితిర్ నాహ వర్తవే యం-యం యుజం కృణుతే బ్రహ్మణస్ పతిః || 2-025-03
తస్మా అర్షన్తి దివ్యా అసశ్చతః స సత్వభిః ప్రథమో గోషు గచ్ఛతి |
అనిభృష్టతవిషిర్ హన్త్య్ ఓజసా యం-యం యుజం కృణుతే బ్రహ్మణస్ పతిః || 2-025-04
తస్మా ఇద్ విశ్వే ధునయన్త సిన్ధవో ऽచ్ఛిద్రా శర్మ దధిరే పురూణి |
దేవానాం సుమ్నే సుభగః స ఏధతే యం-యం యుజం కృణుతే బ్రహ్మణస్ పతిః || 2-025-05
