ఋజునీతీ నో వరుణో మిత్రో నయతు విద్వాన్ |
అర్యమా దేవైః సజోషాః || 1-090-01
తే హి వస్వో వసవానాస్ తే అప్రమూరా మహోభిః |
వ్రతా రక్షన్తే విశ్వాహా || 1-090-02
తే అస్మభ్యం శర్మ యంసన్న్ అమృతా మర్త్యేభ్యః |
బాధమానా అప ద్విషః || 1-090-03
వి నః పథః సువితాయ చియన్త్వ్ ఇన్ద్రో మరుతః |
పూషా భగో వన్ద్యాసః || 1-090-04
ఉత నో ధియో గోగ్రాః పూషన్ విష్ణవ్ ఏవయావః |
కర్తా నః స్వస్తిమతః || 1-090-05
మధు వాతా ఋతాయతే మధు క్షరన్తి సిన్ధవః |
మాధ్వీర్ నః సన్త్వ్ ఓషధీః || 1-090-06
మధు నక్తమ్ ఉతోషసో మధుమత్ పార్థివం రజః |
మధు ద్యౌర్ అస్తు నః పితా || 1-090-07
మధుమాన్ నో వనస్పతిర్ మధుమాఅస్తు సూర్యః |
మాధ్వీర్ గావో భవన్తు నః || 1-090-08
శం నో మిత్రః శం వరుణః శం నో భవత్వ్ అర్యమా |
శం న ఇన్ద్రో బృహస్పతిః శం నో విష్ణుర్ ఉరుక్రమః || 1-090-09
