హిరణ్యకేశో రజసో విసారే ऽహిర్ ధునిర్ వాత ఇవ ధ్రజీమాన్ |
శుచిభ్రాజా ఉషసో నవేదా యశస్వతీర్ అపస్యువో న సత్యాః || 1-079-01
ఆ తే సుపర్ణా అమినన్తఏవైః కృష్ణో నోనావ వృషభో యదీదమ్ |
శివాభిర్ న స్మయమానాభిర్ ఆగాత్ పతన్తి మిహ స్తనయన్త్య్ అభ్రా || 1-079-02
యద్ ఈమ్ ఋతస్య పయసా పియానో నయన్న్ ఋతస్య పథిభీ రజిష్ఠైః |
అర్యమా మిత్రో వరుణః పరిజ్మా త్వచమ్ పృఞ్చన్త్య్ ఉపరస్య యోనౌ || 1-079-03
అగ్నే వాజస్య గోమత ఈశానః సహసో యహో |
అస్మే ధేహి జాతవేదో మహి శ్రవః || 1-079-04
స ఇధానో వసుష్ కవిర్ అగ్నిర్ ఈళేన్యో గిరా |
రేవద్ అస్మభ్యమ్ పుర్వణీక దీదిహి || 1-079-05
క్షపో రాజన్న్ ఉత త్మనాగ్నే వస్తోర్ ఉతోషసః |
స తిగ్మజమ్భ రక్షసో దహ ప్రతి || 1-079-06
అవా నో అగ్న ఊతిభిర్ గాయత్రస్య ప్రభర్మణి |
విశ్వాసు ధీషు వన్ద్య || 1-079-07
ఆ నో అగ్నే రయిమ్ భర సత్రాసాహం వరేణ్యమ్ |
విశ్వాసు పృత్సు దుష్టరమ్ || 1-079-08
ఆ నో అగ్నే సుచేతునా రయిం విశ్వాయుపోషసమ్ |
మార్డీకం ధేహి జీవసే || 1-079-09
ప్ర పూతాస్ తిగ్మశోచిషే వాచో గోతమాగ్నయే |
భరస్వ సుమ్నయుర్ గిరః || 1-079-10
యో నో అగ్నే ऽభిదాసత్య్ అన్తి దూరే పదీష్ట సః |
అస్మాకమ్ ఇద్ వృధే భవ || 1-079-11
సహస్రాక్షో విచర్షణిర్ అగ్నీ రక్షాంసి సేధతి |
హోతా గృణీత ఉక్థ్యః || 1-079-12
