ఆ త్వ్ ఏతా ని షీదతేన్ద్రమ్ అభి ప్ర గాయత |
సఖాయ స్తోమవాహసః || 1-005-01
పురూతమమ్ పురూణామ్ ఈశానం వార్యాణామ్ |
ఇన్ద్రం సోమే సచా సుతే || 1-005-02
స ఘా నో యోగ ఆ భువత్ స రాయే స పురంధ్యామ్ |
గమద్ వాజేభిర్ ఆ స నః || 1-005-03
యస్య సంస్థే న వృణ్వతే హరీ సమత్సు శత్రవః |
తస్మా ఇన్ద్రాయ గాయత || 1-005-04
సుతపావ్నే సుతా ఇమే శుచయో యన్తి వీతయే |
సోమాసో దధ్యాశిరః || 1-005-05
త్వం సుతస్య పీతయే సద్యో వృద్ధో అజాయథాః |
ఇన్ద్ర జ్యైష్ఠ్యాయ సుక్రతో || 1-005-06
ఆ త్వా విశన్త్వ్ ఆశవః సోమాస ఇన్ద్ర గిర్వణః |
శం తే సన్తు ప్రచేతసే || 1-005-07
త్వాం స్తోమా అవీవృధన్ త్వామ్ ఉక్థా శతక్రతో |
త్వాం వర్ధన్తు నో గిరః || 1-005-08
అక్షితోతిః సనేద్ ఇమం వాజమ్ ఇన్ద్రః సహస్రిణమ్ |
యస్మిన్ విశ్వాని పౌంస్యా || 1-005-09
మా నో మర్తా అభి ద్రుహన్ తనూనామ్ ఇన్ద్ర గిర్వణః |
ఈశానో యవయా వధమ్ || 1-005-10
