అగ్నే వివస్వద్ ఉషసశ్ చిత్రం రాధో అమర్త్య |
ఆ దాశుషే జాతవేదో వహా త్వమ్ అద్యా దేవాఉషర్బుధః || 1-044-01
జుష్టో హి దూతో అసి హవ్యవాహనో ऽగ్నే రథీర్ అధ్వరాణామ్ |
సజూర్ అశ్విభ్యామ్ ఉషసా సువీర్యమ్ అస్మే ధేహి శ్రవో బృహత్ || 1-044-02
అద్యా దూతం వృణీమహే వసుమ్ అగ్నిమ్ పురుప్రియమ్ |
ధూమకేతుమ్ భాఋజీకం వ్యుష్టిషు యజ్ఞానామ్ అధ్వరశ్రియమ్ || 1-044-03
శ్రేష్ఠం యవిష్ఠమ్ అతిథిం స్వాహుతం జుష్టం జనాయ దాశుషే |
దేవాఅచ్ఛా యాతవే జాతవేదసమ్ అగ్నిమ్ ఈళే వ్యుష్టిషు || 1-044-04
స్తవిష్యామి త్వామ్ అహం విశ్వస్యామృత భోజన |
అగ్నే త్రాతారమ్ అమృతమ్ మియేధ్య యజిష్ఠం హవ్యవాహన || 1-044-05
సుశంసో బోధి గృణతే యవిష్ఠ్య మధుజిహ్వః స్వాహుతః |
ప్రస్కణ్వస్య ప్రతిరన్న్ ఆయుర్ జీవసే నమస్యా దైవ్యం జనమ్ || 1-044-06
హోతారం విశ్వవేదసం సం హి త్వా విశ ఇన్ధతే |
స ఆ వహ పురుహూత ప్రచేతసో ऽగ్నే దేవాఇహ ద్రవత్ || 1-044-07
సవితారమ్ ఉషసమ్ అశ్వినా భగమ్ అగ్నిం వ్యుష్టిషు క్షపః |
కణ్వాసస్ త్వా సుతసోమాస ఇన్ధతే హవ్యవాహం స్వధ్వర || 1-044-08
పతిర్ హ్య్ అధ్వరాణామ్ అగ్నే దూతో విశామ్ అసి |
ఉషర్బుధ ఆ వహ సోమపీతయే దేవాఅద్య స్వర్దృశః || 1-044-09
అగ్నే పూర్వా అనూషసో విభావసో దీదేథ విశ్వదర్శతః |
అసి గ్రామేష్వ్ అవితా పురోహితో ऽసి యజ్ఞేషు మానుషః || 1-044-10
ని త్వా యజ్ఞస్య సాధనమ్ అగ్నే హోతారమ్ ఋత్విజమ్ |
మనుష్వద్ దేవ ధీమహి ప్రచేతసం జీరం దూతమ్ అమర్త్యమ్ || 1-044-11
యద్ దేవానామ్ మిత్రమహః పురోహితో ऽన్తరో యాసి దూత్యమ్ |
సిన్ధోర్ ఇవ ప్రస్వనితాస ఊర్మయో ऽగ్నేర్ భ్రాజన్తే అర్చయః || 1-044-12
శ్రుధి శ్రుత్కర్ణ వహ్నిభిర్ దేవైర్ అగ్నే సయావభిః |
ఆ సీదన్తు బర్హిషి మిత్రో అర్యమా ప్రాతర్యావాణో అధ్వరమ్ || 1-044-13
శృణ్వన్తు స్తోమమ్ మరుతః సుదానవో ऽగ్నిజిహ్వా ఋతావృధః |
పిబతు సోమం వరుణో ధృతవ్రతో ऽశ్విభ్యామ్ ఉషసా సజూః || 1-044-14
