కద్ ధ నూనం కధప్రియః పితా పుత్రం న హస్తయోః |
దధిధ్వే వృక్తబర్హిషః || 1-038-01
క్వ నూనం కద్ వో అర్థం గన్తా దివో న పృథివ్యాః |
క్వ వో గావో న రణ్యన్తి || 1-038-02
క్వ వః సుమ్నా నవ్యాంసి మరుతః క్వ సువితా |
క్వో విశ్వాని సౌభగా || 1-038-03
యద్ యూయమ్ పృశ్నిమాతరో మర్తాసః స్యాతన |
స్తోతా వో అమృతః స్యాత్ || 1-038-04
మా వో మృగో న యవసే జరితా భూద్ అజోష్యః |
పథా యమస్య గాద్ ఉప || 1-038-05
మో షు ణః పరా-పరా నిరృతిర్ దుర్హణా వధీత్ |
పదీష్ట తృష్ణయా సహ || 1-038-06
సత్యం త్వేషా అమవన్తో ధన్వఞ్ చిద్ ఆ రుద్రియాసః |
మిహం కృణ్వన్త్య్ అవాతామ్ || 1-038-07
వాశ్రేవ విద్యున్ మిమాతి వత్సం న మాతా సిషక్తి |
యద్ ఏషాం వృష్టిర్ అసర్జి || 1-038-08
దివా చిత్ తమః కృణ్వన్తి పర్జన్యేనోదవాహేన |
యత్ పృథివీం వ్యున్దన్తి || 1-038-09
అధ స్వనాన్ మరుతాం విశ్వమ్ ఆ సద్మ పార్థివమ్ |
అరేజన్త ప్ర మానుషాః || 1-038-10
మరుతో వీళుపాణిభిశ్ చిత్రా రోధస్వతీర్ అను |
యాతేమ్ అఖిద్రయామభిః || 1-038-11
స్థిరా వః సన్తు నేమయో రథా అశ్వాస ఏషామ్ |
సుసంస్కృతా అభీశవః || 1-038-12
అచ్ఛా వదా తనా గిరా జరాయై బ్రహ్మణస్ పతిమ్ |
అగ్నిమ్ మిత్రం న దర్శతమ్ || 1-038-13
మిమీహి శ్లోకమ్ ఆస్యే పర్జన్య ఇవ తతనః |
గాయ గాయత్రమ్ ఉక్థ్యమ్ || 1-038-14
వన్దస్వ మారుతం గణం త్వేషమ్ పనస్యుమ్ అర్కిణమ్ |
అస్మే వృద్ధా అసన్న్ ఇహ || 1-038-15
