ప్రతి త్యం చారుమ్ అధ్వరం గోపీథాయ ప్ర హూయసే |
మరుద్భిర్ అగ్న ఆ గహి || 1-019-01
నహి దేవో న మర్త్యో మహస్ తవ క్రతుమ్ పరః |
మరుద్భిర్ అగ్న ఆ గహి || 1-019-02
యే మహో రజసో విదుర్ విశ్వే దేవాసో అద్రుహః |
మరుద్భిర్ అగ్న ఆ గహి || 1-019-03
య ఉగ్రా అర్కమ్ ఆనృచుర్ అనాధృష్టాస ఓజసా |
మరుద్భిర్ అగ్న ఆ గహి || 1-019-04
యే శుభ్రా ఘోరవర్పసః సుక్షత్రాసో రిశాదసః |
మరుద్భిర్ అగ్న ఆ గహి || 1-019-05
యే నాకస్యాధి రోచనే దివి దేవాస ఆసతే |
మరుద్భిర్ అగ్న ఆ గహి || 1-019-06
య ఈఙ్ఖయన్తి పర్వతాన్ తిరః సముద్రమ్ అర్ణవమ్ |
మరుద్భిర్ అగ్న ఆ గహి || 1-019-07
ఆ యే తన్వన్తి రశ్మిభిస్ తిరః సముద్రమ్ ఓజసా |
మరుద్భిర్ అగ్న ఆ గహి || 1-019-08
అభి త్వా పూర్వపీతయే సృజామి సోమ్యమ్ మధు |
మరుద్భిర్ అగ్న ఆ గహి || 1-019-09
