త్వం రాజేన్ద్ర యే చ దేవా రక్షా నౄన్ పాహ్య్ అసుర త్వమ్ అస్మాన్ |
త్వం సత్పతిర్ మఘవా నస్ తరుత్రస్ త్వం సత్యో వసవానః సహోదాః || 1-174-01
దనో విశ ఇన్ద్ర మృధ్రవాచః సప్త యత్ పురః శర్మ శారదీర్ దర్త్ |
ఋణోర్ అపో అనవద్యార్ణా యూనే వృత్రమ్ పురుకుత్సాయ రన్ధీః || 1-174-02
అజా వృత ఇన్ద్ర శూరపత్నీర్ ద్యాం చ యేభిః పురుహూత నూనమ్ |
రక్షో అగ్నిమ్ అశుషం తూర్వయాణం సింహో న దమే అపాంసి వస్తోః || 1-174-03
శేషన్ ను త ఇన్ద్ర సస్మిన్ యోనౌ ప్రశస్తయే పవీరవస్య మహ్నా |
సృజద్ అర్ణాంస్య్ అవ యద్ యుధా గాస్ తిష్ఠద్ ధరీ ధృషతా మృష్ట వాజాన్ || 1-174-04
వహ కుత్సమ్ ఇన్ద్ర యస్మిఞ్ చాకన్ స్యూమన్యూ ఋజ్రా వాతస్యాశ్వా |
ప్ర సూరశ్ చక్రం వృహతాద్ అభీకే ऽభి స్పృధో యాసిషద్ వజ్రబాహుః || 1-174-05
జఘన్వాఇన్ద్ర మిత్రేరూఞ్ చోదప్రవృద్ధో హరివో అదాశూన్ |
ప్ర యే పశ్యన్న్ అర్యమణం సచాయోస్ త్వయా శూర్తా వహమానా అపత్యమ్ || 1-174-06
రపత్ కవిర్ ఇన్ద్రార్కసాతౌ క్షాం దాసాయోపబర్హణీం కః |
కరత్ తిస్రో మఘవా దానుచిత్రా ని దుర్యోణే కుయవాచమ్ మృధి శ్రేత్ || 1-174-07
సనా తా త ఇన్ద్ర నవ్యా ఆగుః సహో నభో ऽవిరణాయ పూర్వీః |
భినత్ పురో న భిదో అదేవీర్ ననమో వధర్ అదేవస్య పీయోః || 1-174-08
త్వం ధునిర్ ఇన్ద్ర ధునిమతీర్ ఋణోర్ అపః సీరా న స్రవన్తీః |
ప్ర యత్ సముద్రమ్ అతి శూర పర్షి పారయా తుర్వశం యదుం స్వస్తి || 1-174-09
త్వమ్ అస్మాకమ్ ఇన్ద్ర విశ్వధ స్యా అవృకతమో నరాం నృపాతా |
స నో విశ్వాసాం స్పృధాం సహోదా విద్యామేషం వృజనం జీరదానుమ్ || 1-174-10
