ఇన్ద్రావరుణయోర్ అహం సమ్రాజోర్ అవ ఆ వృణే |
తా నో మృళాత ఈదృశే || 1-017-01
గన్తారా హి స్థో ऽవసే హవం విప్రస్య మావతః |
ధర్తారా చర్షణీనామ్ || 1-017-02
అనుకామం తర్పయేథామ్ ఇన్ద్రావరుణ రాయ ఆ |
తా వాం నేదిష్ఠమ్ ఈమహే || 1-017-03
యువాకు హి శచీనాం యువాకు సుమతీనామ్ |
భూయామ వాజదావ్నామ్ || 1-017-04
ఇన్ద్రః సహస్రదావ్నాం వరుణః శంస్యానామ్ |
క్రతుర్ భవత్య్ ఉక్థ్యః || 1-017-05
తయోర్ ఇద్ అవసా వయం సనేమ ని చ ధీమహి |
స్యాద్ ఉత ప్రరేచనమ్ || 1-017-06
ఇన్ద్రావరుణ వామ్ అహం హువే చిత్రాయ రాధసే |
అస్మాన్ సు జిగ్యుషస్ కృతమ్ || 1-017-07
ఇన్ద్రావరుణ నూ ను వాం సిషాసన్తీషు ధీష్వ్ ఆ |
అస్మభ్యం శర్మ యచ్ఛతమ్ || 1-017-08
ప్ర వామ్ అశ్నోతు సుష్టుతిర్ ఇన్ద్రావరుణ యాం హువే |
యామ్ ఋధాథే సధస్తుతిమ్ || 1-017-09
