సమిద్ధో అగ్న ఆ వహ దేవాఅద్య యతస్రుచే |
తన్తుం తనుష్వ పూర్వ్యం సుతసోమాయ దాశుషే || 1-142-01
ఘృతవన్తమ్ ఉప మాసి మధుమన్తం తనూనపాత్ |
యజ్ఞం విప్రస్య మావతః శశమానస్య దాశుషః || 1-142-02
శుచిః పావకో అద్భుతో మధ్వా యజ్ఞమ్ మిమిక్షతి |
నరాశంసః త్రిర్ ఆ దివో దేవో దేవేషు యజ్ఞియః || 1-142-03
ఈళితో అగ్న ఆ వహేన్ద్రం చిత్రమ్ ఇహ ప్రియమ్ |
ఇయం హి త్వా మతిర్ మమాచ్ఛా సుజిహ్వ వచ్యతే || 1-142-04
స్తృణానాసో యతస్రుచో బర్హిర్ యజ్ఞే స్వధ్వరే |
వృఞ్జే దేవవ్యచస్తమమ్ ఇన్ద్రాయ శర్మ సప్రథః || 1-142-05
వి శ్రయన్తామ్ ఋతావృధః ప్రయై దేవేభ్యో మహీః |
పావకాసః పురుస్పృహో ద్వారో దేవీర్ అసశ్చతః || 1-142-06
ఆ భన్దమానే ఉపాకే నక్తోషాసా సుపేశసా |
యహ్వీ ఋతస్య మాతరా సీదతామ్ బర్హిర్ ఆ సుమత్ || 1-142-07
మన్ద్రజిహ్వా జుగుర్వణీ హోతారా దైవ్యా కవీ |
యజ్ఞం నో యక్షతామ్ ఇమం సిధ్రమ్ అద్య దివిస్పృశమ్ || 1-142-08
శుచిర్ దేవేష్వ్ అర్పితా హోత్రా మరుత్సు భారతీ |
ఇళా సరస్వతీ మహీ బర్హిః సీదన్తు యజ్ఞియాః || 1-142-09
తన్ నస్ తురీపమ్ అద్భుతమ్ పురు వారమ్ పురు త్మనా |
త్వష్టా పోషాయ వి ష్యతు రాయే నాభా నో అస్మయుః || 1-142-10
అవసృజన్న్ ఉప త్మనా దేవాన్ యక్షి వనస్పతే |
అగ్నిర్ హవ్యా సుషూదతి దేవో దేవేషు మేధిరః || 1-142-11
పూషణ్వతే మరుత్వతే విశ్వదేవాయ వాయవే |
స్వాహా గాయత్రవేపసే హవ్యమ్ ఇన్ద్రాయ కర్తన || 1-142-12
స్వాహాకృతాన్య్ ఆ గహ్య్ ఉప హవ్యాని వీతయే |
ఇన్ద్రా గహి శ్రుధీ హవం త్వాం హవన్తే అధ్వరే || 1-142-13
