ప్ర వః పాన్తం రఘుమన్యవో ऽన్ధో యజ్ఞం రుద్రాయ మీళ్హుషే భరధ్వమ్ |
దివో అస్తోష్య్ అసురస్య వీరైర్ ఇషుధ్యేవ మరుతో రోదస్యోః || 1-122-01
పత్నీవ పూర్వహూతిం వావృధధ్యా ఉషాసానక్తా పురుధా విదానే |
స్తరీర్ నాత్కం వ్యుతం వసానా సూర్యస్య శ్రియా సుదృశీ హిరణ్యైః || 1-122-02
మమత్తు నః పరిజ్మా వసర్హా మమత్తు వాతో అపాం వృషణ్వాన్ |
శిశీతమ్ ఇన్ద్రాపర్వతా యువం నస్ తన్ నో విశ్వే వరివస్యన్తు దేవాః || 1-122-03
ఉత త్యా మే యశసా శ్వేతనాయై వ్యన్తా పాన్తౌశిజో హువధ్యై |
ప్ర వో నపాతమ్ అపాం కృణుధ్వమ్ ప్ర మాతరా రాస్పినస్యాయోః || 1-122-04
ఆ వో రువణ్యుమ్ ఔశిజో హువధ్యై ఘోషేవ శంసమ్ అర్జునస్య నంశే |
ప్ర వః పూష్ణే దావన ఆఅచ్ఛా వోచేయ వసుతాతిమ్ అగ్నేః || 1-122-05
శ్రుతమ్ మే మిత్రావరుణా హవేమోత శ్రుతం సదనే విశ్వతః సీమ్ |
శ్రోతు నః శ్రోతురాతిః సుశ్రోతుః సుక్షేత్రా సిన్ధుర్ అద్భిః || 1-122-06
స్తుషే సా వాం వరుణ మిత్ర రాతిర్ గవాం శతా పృక్షయామేషు పజ్రే |
శ్రుతరథే ప్రియరథే దధానాః సద్యః పుష్టిం నిరున్ధానాసో అగ్మన్ || 1-122-07
అస్య స్తుషే మహిమఘస్య రాధః సచా సనేమ నహుషః సువీరాః |
జనో యః పజ్రేభ్యో వాజినీవాన్ అశ్వావతో రథినో మహ్యం సూరిః || 1-122-08
జనో యో మిత్రావరుణావ్ అభిధ్రుగ్ అపో న వాం సునోత్య్ అక్ష్ణయాధ్రుక్ |
స్వయం స యక్ష్మం హృదయే ని ధత్త ఆప యద్ ఈం హోత్రాభిర్ ఋతావా || 1-122-09
స వ్రాధతో నహుషో దంసుజూతః శర్ధస్తరో నరాం గూర్తశ్రవాః |
విసృష్టరాతిర్ యాతి బాళ్హసృత్వా విశ్వాసు పృత్సు సదమ్ ఇచ్ ఛూరః || 1-122-10
అధ గ్మన్తా నహుషో హవం సూరేః శ్రోతా రాజానో అమృతస్య మన్ద్రాః |
నభోజువో యన్ నిరవస్య రాధః ప్రశస్తయే మహినా రథవతే || 1-122-11
ఏతం శర్ధం ధామ యస్య సూరేర్ ఇత్య్ అవోచన్ దశతయస్య నంశే |
ద్యుమ్నాని యేషు వసుతాతీ రారన్ విశ్వే సన్వన్తు ప్రభృథేషు వాజమ్ || 1-122-12
మన్దామహే దశతయస్య ధాసేర్ ద్విర్ యత్ పఞ్చ బిభ్రతో యన్త్య్ అన్నా |
కిమ్ ఇష్టాశ్వ ఇష్టరశ్మిర్ ఏత ఈశానాసస్ తరుష ఋఞ్జతే నౄన్ || 1-122-13
హిరణ్యకర్ణమ్ మణిగ్రీవమ్ అర్ణస్ తన్ నో విశ్వే వరివస్యన్తు దేవాః |
అర్యో గిరః సద్య ఆ జగ్ముషీర్ ఓస్రాశ్ చాకన్తూభయేష్వ్ అస్మే || 1-122-14
చత్వారో మా మశర్శారస్య శిశ్వస్ త్రయో రాజ్ఞ ఆయవసస్య జిష్ణోః |
రథో వామ్ మిత్రావరుణా దీర్ఘాప్సాః స్యూమగభస్తిః సూరో నాద్యౌత్ || 1-122-15
