మధ్వః సోమస్యాశ్వినా మదాయ ప్రత్నో హోతా వివాసతే వామ్ |
బర్హిష్మతీ రాతిర్ విశ్రితా గీర్ ఇషా యాతం నాసత్యోప వాజైః || 1-117-01
యో వామ్ అశ్వినా మనసో జవీయాన్ రథః స్వశ్వో విశ ఆజిగాతి |
యేన గచ్ఛథః సుకృతో దురోణం తేన నరా వర్తిర్ అస్మభ్యం యాతమ్ || 1-117-02
ఋషిం నరావ్ అంహసః పాఞ్చజన్యమ్ ఋబీసాద్ అత్రిమ్ ముఞ్చథో గణేన |
మినన్తా దస్యోర్ అశివస్య మాయా అనుపూర్వం వృషణా చోదయన్తా || 1-117-03
అశ్వం న గూళ్హమ్ అశ్వినా దురేవైర్ ఋషిం నరా వృషణా రేభమ్ అప్సు |
సం తం రిణీథో విప్రుతం దంసోభిర్ న వాం జూర్యన్తి పూర్వ్యా కృతాని || 1-117-04
సుషుప్వాంసం న నిరృతేర్ ఉపస్థే సూర్యం న దస్రా తమసి క్షియన్తమ్ |
శుభే రుక్మం న దర్శతం నిఖాతమ్ ఉద్ ఊపథుర్ అశ్వినా వన్దనాయ || 1-117-05
తద్ వాం నరా శంస్యమ్ పజ్రియేణ కక్షీవతా నాసత్యా పరిజ్మన్ |
శఫాద్ అశ్వస్య వాజినో జనాయ శతం కుమ్భాఅసిఞ్చతమ్ మధూనామ్ || 1-117-06
యువం నరా స్తువతే కృష్ణియాయ విష్ణాప్వం దదథుర్ విశ్వకాయ |
ఘోషాయై చిత్ పితృషదే దురోణే పతిం జూర్యన్త్యా అశ్వినావ్ అదత్తమ్ || 1-117-07
యువం శ్యావాయ రుశతీమ్ అదత్తమ్ మహః క్షోణస్యాశ్వినా కణ్వాయ |
ప్రవాచ్యం తద్ వృషణా కృతం వాం యన్ నార్షదాయ శ్రవో అధ్యధత్తమ్ || 1-117-08
పురూ వర్పాంస్య్ అశ్వినా దధానా ని పేదవ ఊహథుర్ ఆశుమ్ అశ్వమ్ |
సహస్రసాం వాజినమ్ అప్రతీతమ్ అహిహనం శ్రవస్యం తరుత్రమ్ || 1-117-09
ఏతాని వాం శ్రవస్యా సుదానూ బ్రహ్మాఙ్గూషం సదనం రోదస్యోః |
యద్ వామ్ పజ్రాసో అశ్వినా హవన్తే యాతమ్ ఇషా చ విదుషే చ వాజమ్ || 1-117-10
సూనోర్ మానేనాశ్వినా గృణానా వాజం విప్రాయ భురణా రదన్తా |
అగస్త్యే బ్రహ్మణా వావృధానా సం విశ్పలాం నాసత్యారిణీతమ్ || 1-117-11
కుహ యాన్తా సుష్టుతిం కావ్యస్య దివో నపాతా వృషణా శయుత్రా |
హిరణ్యస్యేవ కలశం నిఖాతమ్ ఉద్ ఊపథుర్ దశమే అశ్వినాహన్ || 1-117-12
యువం చ్యవానమ్ అశ్వినా జరన్తమ్ పునర్ యువానం చక్రథుః శచీభిః |
యువో రథం దుహితా సూర్యస్య సహ శ్రియా నాసత్యావృణీత || 1-117-13
యువం తుగ్రాయ పూర్వ్యేభిర్ ఏవైః పునర్మన్యావ్ అభవతం యువానా |
యువమ్ భుజ్యుమ్ అర్ణసో నిః సముద్రాద్ విభిర్ ఊహథుర్ ఋజ్రేభిర్ అశ్వైః || 1-117-14
అజోహవీద్ అశ్వినా తౌగ్ర్యో వామ్ ప్రోళ్హః సముద్రమ్ అవ్యథిర్ జగన్వాన్ |
నిష్ టమ్ ఊహథుః సుయుజా రథేన మనోజవసా వృషణా స్వస్తి || 1-117-15
అజోహవీద్ అశ్వినా వర్తికా వామ్ ఆస్నో యత్ సీమ్ అముఞ్చతం వృకస్య |
వి జయుషా యయథుః సాన్వ్ అద్రేర్ జాతం విష్వాచో అహతం విషేణ || 1-117-16
శతమ్ మేషాన్ వృక్యే మామహానం తమః ప్రణీతమ్ అశివేన పిత్రా |
ఆక్షీ ఋజ్రాశ్వే అశ్వినావ్ అధత్తం జ్యోతిర్ అన్ధాయ చక్రథుర్ విచక్షే || 1-117-17
శునమ్ అన్ధాయ భరమ్ అహ్వయత్ సా వృకీర్ అశ్వినా వృషణా నరేతి |
జారః కనీన ఇవ చక్షదాన ఋజ్రాశ్వః శతమ్ ఏకం చ మేషాన్ || 1-117-18
మహీ వామ్ ఊతిర్ అశ్వినా మయోభూర్ ఉత స్రామం ధిష్ణ్యా సం రిణీథః |
అథా యువామ్ ఇద్ అహ్వయత్ పురంధిర్ ఆగచ్ఛతం సీం వృషణావ్ అవోభిః || 1-117-19
అధేనుం దస్రా స్తర్యం విషక్తామ్ అపిన్వతం శయవే అశ్వినా గామ్ |
యువం శచీభిర్ విమదాయ జాయాం న్య్ ఊహథుః పురుమిత్రస్య యోషామ్ || 1-117-20
యవం వృకేణాశ్వినా వపన్తేషం దుహన్తా మనుషాయ దస్రా |
అభి దస్యుమ్ బకురేణా ధమన్తోరు జ్యోతిశ్ చక్రథుర్ ఆర్యాయ || 1-117-21
ఆథర్వణాయాశ్వినా దధీచే ऽశ్వ్యం శిరః ప్రత్య్ ఐరయతమ్ |
స వామ్ మధు ప్ర వోచద్ ఋతాయన్ త్వాష్ట్రం యద్ దస్రావ్ అపికక్ష్యం వామ్ || 1-117-22
సదా కవీ సుమతిమ్ ఆ చకే వాం విశ్వా ధియో అశ్వినా ప్రావతమ్ మే |
అస్మే రయిం నాసత్యా బృహన్తమ్ అపత్యసాచం శ్రుత్యం రరాథామ్ || 1-117-23
హిరణ్యహస్తమ్ అశ్వినా రరాణా పుత్రం నరా వధ్రిమత్యా అదత్తమ్ |
త్రిధా హ శ్యావమ్ అశ్వినా వికస్తమ్ ఉజ్ జీవస ఐరయతం సుదానూ || 1-117-24
ఏతాని వామ్ అశ్వినా వీర్యాణి ప్ర పూర్వ్యాణ్య్ ఆయవో ऽవోచన్ |
బ్రహ్మ కృణ్వన్తో వృషణా యువభ్యాం సువీరాసో విదథమ్ ఆ వదేమ || 1-117-25
