ఇమా రుద్రాయ తవసే కపర్దినే క్షయద్వీరాయ ప్ర భరామహే మతీః |
యథా శమ్ అసద్ ద్విపదే చతుష్పదే విశ్వమ్ పుష్టం గ్రామే అస్మిన్న్ అనాతురమ్ || 1-114-01
మృళా నో రుద్రోత నో మయస్ కృధి క్షయద్వీరాయ నమసా విధేమ తే |
యచ్ ఛం చ యోశ్ చ మనుర్ ఆయేజే పితా తద్ అశ్యామ తవ రుద్ర ప్రణీతిషు || 1-114-02
అశ్యామ తే సుమతిం దేవయజ్యయా క్షయద్వీరస్య తవ రుద్ర మీఢ్వః |
సుమ్నాయన్న్ ఇద్ విశో అస్మాకమ్ ఆ చరారిష్టవీరా జుహవామ తే హవిః || 1-114-03
త్వేషం వయం రుద్రం యజ్ఞసాధం వఙ్కుం కవిమ్ అవసే ని హ్వయామహే |
ఆరే అస్మద్ దైవ్యం హేళో అస్యతు సుమతిమ్ ఇద్ వయమ్ అస్యా వృణీమహే || 1-114-04
దివో వరాహమ్ అరుషం కపర్దినం త్వేషం రూపం నమసా ని హ్వయామహే |
హస్తే బిభ్రద్ భేషజా వార్యాణి శర్మ వర్మ ఛర్దిర్ అస్మభ్యం యంసత్ || 1-114-05
ఇదమ్ పిత్రే మరుతామ్ ఉచ్యతే వచః స్వాదోః స్వాదీయో రుద్రాయ వర్ధనమ్ |
రాస్వా చ నో అమృత మర్తభోజనం త్మనే తోకాయ తనయాయ మృళ || 1-114-06
మా నో మహాన్తమ్ ఉత మా నో అర్భకమ్ మా న ఉక్షన్తమ్ ఉత మా న ఉక్షితమ్ |
మా నో వధీః పితరమ్ మోత మాతరమ్ మా నః ప్రియాస్ తన్వో రుద్ర రీరిషః || 1-114-07
మా నస్ తోకే తనయే మా న ఆయౌ మా నో గోషు మా నో అశ్వేషు రీరిషః |
వీరాన్ మా నో రుద్ర భామితో వధీర్ హవిష్మన్తః సదమ్ ఇత్ త్వా హవామహే || 1-114-08
ఉప తే స్తోమాన్ పశుపా ఇవాకరం రాస్వా పితర్ మరుతాం సుమ్నమ్ అస్మే |
భద్రా హి తే సుమతిర్ మృళయత్తమాథా వయమ్ అవ ఇత్ తే వృణీమహే || 1-114-09
ఆరే తే గోఘ్నమ్ ఉత పూరుషఘ్నం క్షయద్వీర సుమ్నమ్ అస్మే తే అస్తు |
మృళా చ నో అధి చ బ్రూహి దేవాధా చ నః శర్మ యచ్ఛ ద్విబర్హాః || 1-114-10
అవోచామ నమో అస్మా అవస్యవః శృణోతు నో హవం రుద్రో మరుత్వాన్ |
తన్ నో మిత్రో వరుణో మామహన్తామ్ అదితిః సిన్ధుః పృథివీ ఉత ద్యౌః || 1-114-11
