చన్ద్రమా అప్స్వ్ అన్తర్ ఆ సుపర్ణో ధావతే దివి |
న వో హిరణ్యనేమయః పదం విన్దన్తి విద్యుతో విత్తమ్ మే అస్య రోదసీ || 1-105-01
అర్థమ్ ఇద్ వా ఉ అర్థిన ఆ జాయా యువతే పతిమ్ |
తుఞ్జాతే వృష్ణ్యమ్ పయః పరిదాయ రసం దుహే విత్తమ్ మే అస్య రోదసీ || 1-105-02
మో షు దేవా అదః స్వర్ అవ పాది దివస్ పరి |
మా సోమ్యస్య శమ్భువః శూనే భూమ కదా చన విత్తమ్ మే అస్య రోదసీ || 1-105-03
యజ్ఞమ్ పృచ్ఛామ్య్ అవమం స తద్ దూతో వి వోచతి |
క్వ ఋతమ్ పూర్వ్యం గతం కస్ తద్ బిభర్తి నూతనో విత్తమ్ మే అస్య రోదసీ || 1-105-04
అమీ యే దేవా స్థన త్రిష్వ్ ఆ రోచనే దివః |
కద్ వ ఋతం కద్ అనృతం క్వ ప్రత్నా వ ఆహుతిర్ విత్తమ్ మే అస్య రోదసీ || 1-105-05
కద్ వ ఋతస్య ధర్ణసి కద్ వరుణస్య చక్షణమ్ |
కద్ అర్యమ్ణో మహస్ పథాతి క్రామేమ దూఢ్యో విత్తమ్ మే అస్య రోదసీ || 1-105-06
అహం సో అస్మి యః పురా సుతే వదామి కాని చిత్ |
తమ్ మా వ్యన్త్య్ ఆధ్యో వృకో న తృష్ణజమ్ మృగం విత్తమ్ మే అస్య రోదసీ || 1-105-07
సమ్ మా తపన్త్య్ అభితః సపత్నీర్ ఇవ పర్శవః |
మూషో న శిశ్నా వ్య్ అదన్తి మాధ్య స్తోతారం తే శతక్రతో విత్తమ్ మే అస్య రోదసీ || 1-105-08
అమీ యే సప్త రశ్మయస్ తత్రా మే నాభిర్ ఆతతా |
త్రితస్ తద్ వేదాప్త్యః స జామిత్వాయ రేభతి విత్తమ్ మే అస్య రోదసీ || 1-105-09
అమీ యే పఞ్చోక్షణో మధ్యే తస్థుర్ మహో దివః |
దేవత్రా ను ప్రవాచ్యం సధ్రీచీనా ని వావృతుర్ విత్తమ్ మే అస్య రోదసీ || 1-105-10
సుపర్ణా ఏత ఆసతే మధ్య ఆరోధనే దివః |
తే సేధన్తి పథో వృకం తరన్తం యహ్వతీర్ అపో విత్తమ్ మే అస్య రోదసీ || 1-105-11
నవ్యం తద్ ఉక్థ్యం హితం దేవాసః సుప్రవాచనమ్ |
ఋతమ్ అర్షన్తి సిన్ధవః సత్యం తాతాన సూర్యో విత్తమ్ మే అస్య రోదసీ || 1-105-12
అగ్నే తవ త్యద్ ఉక్థ్యం దేవేష్వ్ అస్త్య్ ఆప్యమ్ |
స నః సత్తో మనుష్వద్ ఆ దేవాన్ యక్షి విదుష్టరో విత్తమ్ మే అస్య రోదసీ || 1-105-13
సత్తో హోతా మనుష్వద్ ఆ దేవాఅచ్ఛా విదుష్టరః |
అగ్నిర్ హవ్యా సుషూదతి దేవో దేవేషు మేధిరో విత్తమ్ మే అస్య రోదసీ || 1-105-14
బ్రహ్మా కృణోతి వరుణో గాతువిదం తమ్ ఈమహే |
వ్య్ ఊర్ణోతి హృదా మతిం నవ్యో జాయతామ్ ఋతం విత్తమ్ మే అస్య రోదసీ || 1-105-15
అసౌ యః పన్థా ఆదిత్యో దివి ప్రవాచ్యం కృతః |
న స దేవా అతిక్రమే తమ్ మర్తాసో న పశ్యథ విత్తమ్ మే అస్య రోదసీ || 1-105-16
త్రితః కూపే ऽవహితో దేవాన్ హవత ఊతయే |
తచ్ ఛుశ్రావ బృహస్పతిః కృణ్వన్న్ అంహూరణాద్ ఉరు విత్తమ్ మే అస్య రోదసీ || 1-105-17
అరుణో మా సకృద్ వృకః పథా యన్తం దదర్శ హి |
ఉజ్ జిహీతే నిచాయ్యా తష్టేవ పృష్ట్యామయీ విత్తమ్ మే అస్య రోదసీ || 1-105-18
ఏనాఙ్గూషేణ వయమ్ ఇన్ద్రవన్తో ऽభి ష్యామ వృజనే సర్వవీరాః |
తన్ నో మిత్రో వరుణో మామహన్తామ్ అదితిః సిన్ధుః పృథివీ ఉత ద్యౌః || 1-105-19
