ఆపో హి ష్ఠా మయోభువస్ తా న ఊర్జే దధాతన |
మహే రణాయ చక్షసే || 10-009-01
యో వః శివతమో రసస్ తస్య భాజయతేహ నః |
ఉశతీర్ ఇవ మాతరః || 10-009-02
తస్మా అరం గమామ వో యస్య క్షయాయ జిన్వథ |
ఆపో జనయథా చ నః || 10-009-03
శం నో దేవీర్ అభిష్టయ ఆపో భవన్తు పీతయే |
శం యోర్ అభి స్రవన్తు నః || 10-009-04
ఈశానా వార్యాణాం క్షయన్తీశ్ చర్షణీనామ్ |
అపో యాచామి భేషజమ్ || 10-009-05
అప్సు మే సోమో అబ్రవీద్ అన్తర్ విశ్వాని భేషజా |
అగ్నిం చ విశ్వశమ్భువమ్ || 10-009-06
ఆపః పృణీత భేషజం వరూథం తన్వే మమ |
జ్యోక్ చ సూర్యం దృశే || 10-009-07
ఇదమ్ ఆపః ప్ర వహత యత్ కిం చ దురితమ్ మయి |
యద్ వాహమ్ అభిదుద్రోహ యద్ వా శేప ఉతానృతమ్ || 10-009-08
ఆపో అద్యాన్వ్ అచారిషం రసేన సమ్ అగస్మహి |
పయస్వాన్ అగ్న ఆ గహి తమ్ మా సం సృజ వర్చసా || 10-009-09
