దేవానాం ను వయం జానా ప్ర వోచామ విపన్యయా |
ఉక్థేషు శస్యమానేషు యః పశ్యాద్ ఉత్తరే యుగే || 10-072-01
బ్రహ్మణస్ పతిర్ ఏతా సం కర్మార ఇవాధమత్ |
దేవానామ్ పూర్వ్యే యుగే ऽసతః సద్ అజాయత || 10-072-02
దేవానాం యుగే ప్రథమే ऽసతః సద్ అజాయత |
తద్ ఆశా అన్వ్ అజాయన్త తద్ ఉత్తానపదస్ పరి || 10-072-03
భూర్ జజ్ఞ ఉత్తానపదో భువ ఆశా అజాయన్త |
అదితేర్ దక్షో అజాయత దక్షాద్ వ్ అదితిః పరి || 10-072-04
అదితిర్ హ్య్ అజనిష్ట దక్ష యా దుహితా తవ |
తాం దేవా అన్వ్ అజాయన్త భద్రా అమృతబన్ధవః || 10-072-05
యద్ దేవా అదః సలిలే సుసంరబ్ధా అతిష్ఠత |
అత్రా వో నృత్యతామ్ ఇవ తీవ్రో రేణుర్ అపాయత || 10-072-06
యద్ దేవా యతయో యథా భువనాన్య్ అపిన్వత |
అత్రా సముద్ర ఆ గూళ్హమ్ ఆ సూర్యమ్ అజభర్తన || 10-072-07
అష్టౌ పుత్రాసో అదితేర్ యే జాతాస్ తన్వస్ పరి |
దేవాఉప ప్రైత్ సప్తభిః పరా మార్తాణ్డమ్ ఆస్యత్ || 10-072-08
సప్తభిః పుత్రైర్ అదితిర్ ఉప ప్రైత్ పూర్వ్యం యుగమ్ |
ప్రజాయై మృత్యవే త్వత్ పునర్ మార్తాణ్డమ్ ఆభరత్ || 10-072-09
