కథా దేవానాం కతమస్య యామని సుమన్తు నామ శృణ్వతామ్ మనామహే |
కో మృళాతి కతమో నో మయస్ కరత్ కతమ ఊతీ అభ్య్ ఆ వవర్తతి || 10-064-01
క్రతూయన్తి క్రతవో హృత్సు ధీతయో వేనన్తి వేనాః పతయన్త్య్ ఆ దిశః |
న మర్డితా విద్యతే అన్య ఏభ్యో దేవేషు మే అధి కామా అయంసత || 10-064-02
నరా వా శంసమ్ పూషణమ్ అగోహ్యమ్ అగ్నిం దేవేద్ధమ్ అభ్య్ అర్చసే గిరా |
సూర్యామాసా చన్ద్రమసా యమం దివి త్రితం వాతమ్ ఉషసమ్ అక్తుమ్ అశ్వినా || 10-064-03
కథా కవిస్ తువీరవాన్ కయా గిరా బృహస్పతిర్ వావృధతే సువృక్తిభిః |
అజ ఏకపాత్ సుహవేభిర్ ఋక్వభిర్ అహిః శృణోతు బుధ్న్యో హవీమని || 10-064-04
దక్షస్య వాదితే జన్మని వ్రతే రాజానా మిత్రావరుణా వివాససి |
అతూర్తపన్థాః పురురథో అర్యమా సప్తహోతా విషురూపేషు జన్మసు || 10-064-05
తే నో అర్వన్తో హవనశ్రుతో హవం విశ్వే శృణ్వన్తు వాజినో మితద్రవః |
సహస్రసా మేధసాతావ్ ఇవ త్మనా మహో యే ధనం సమిథేషు జభ్రిరే || 10-064-06
ప్ర వో వాయుం రథయుజమ్ పురంధిం స్తోమైః కృణుధ్వం సఖ్యాయ పూషణమ్ |
తే హి దేవస్య సవితుః సవీమని క్రతుం సచన్తే సచితః సచేతసః || 10-064-07
త్రిః సప్త సస్రా నద్యో మహీర్ అపో వనస్పతీన్ పర్వతాఅగ్నిమ్ ఊతయే |
కృశానుమ్ అస్తౄన్ తిష్యం సధస్థ ఆ రుద్రం రుద్రేషు రుద్రియం హవామహే || 10-064-08
సరస్వతీ సరయుః సిన్ధుర్ ఊర్మిభిర్ మహో మహీర్ అవసా యన్తు వక్షణీః |
దేవీర్ ఆపో మాతరః సూదయిత్న్వో ఘృతవత్ పయో మధుమన్ నో అర్చత || 10-064-09
ఉత మాతా బృహద్దివా శృణోతు నస్ త్వష్టా దేవేభిర్ జనిభిః పితా వచః |
ఋభుక్షా వాజో రథస్పతిర్ భగో రణ్వః శంసః శశమానస్య పాతు నః || 10-064-10
రణ్వః సందృష్టౌ పితుమాఇవ క్షయో భద్రా రుద్రాణామ్ మరుతామ్ ఉపస్తుతిః |
గోభిః ష్యామ యశసో జనేష్వ్ ఆ సదా దేవాస ఇళయా సచేమహి || 10-064-11
యామ్ మే ధియమ్ మరుత ఇన్ద్ర దేవా అదదాత వరుణ మిత్ర యూయమ్ |
తామ్ పీపయత పయసేవ ధేనుం కువిద్ గిరో అధి రథే వహాథ || 10-064-12
కువిద్ అఙ్గ ప్రతి యథా చిద్ అస్య నః సజాత్యస్య మరుతో బుబోధథ |
నాభా యత్ర ప్రథమం సంనసామహే తత్ర జామిత్వమ్ అదితిర్ దధాతు నః || 10-064-13
తే హి ద్యావాపృథివీ మాతరా మహీ దేవీ దేవాఞ్ జన్మనా యజ్ఞియే ఇతః |
ఉభే బిభృత ఉభయమ్ భరీమభిః పురూ రేతాంసి పితృభిశ్ చ సిఞ్చతః || 10-064-14
వి షా హోత్రా విశ్వమ్ అశ్నోతి వార్యమ్ బృహస్పతిర్ అరమతిః పనీయసీ |
గ్రావా యత్ర మధుషుద్ ఉచ్యతే బృహద్ అవీవశన్త మతిభిర్ మనీషిణః || 10-064-15
ఏవా కవిస్ తువీరవాఋతజ్ఞా ద్రవిణస్యుర్ ద్రవిణసశ్ చకానః |
ఉక్థేభిర్ అత్ర మతిభిశ్ చ విప్రో ऽపీపయద్ గయో దివ్యాని జన్మ || 10-064-16
ఏవా ప్లతేః సూనుర్ అవీవృధద్ వో విశ్వ ఆదిత్యా అదితే మనీషీ |
ఈశానాసో నరో అమర్త్యేనాస్తావి జనో దివ్యో గయేన || 10-064-17