ఇదం త ఏకమ్ పర ఊ త ఏకం తృతీయేన జ్యోతిషా సం విశస్వ |
సంవేశనే తన్వశ్ చారుర్ ఏధి ప్రియో దేవానామ్ పరమే జనిత్రే || 10-056-01
తనూష్ టే వాజిన్ తన్వం నయన్తీ వామమ్ అస్మభ్యం ధాతు శర్మ తుభ్యమ్ |
అహ్రుతో మహో ధరుణాయ దేవాన్ దివీవ జ్యోతిః స్వమ్ ఆ మిమీయాః || 10-056-02
వాజ్య్ అసి వాజినేనా సువేనీః సువిత స్తోమం సువితో దివం గాః |
సువితో ధర్మ ప్రథమాను సత్యా సువితో దేవాన్ సువితో ऽను పత్మ || 10-056-03
మహిమ్న ఏషామ్ పితరశ్ చనేశిరే దేవా దేవేష్వ్ అదధుర్ అపి క్రతుమ్ |
సమ్ అవివ్యచుర్ ఉత యాన్య్ అత్విషుర్ ఐషాం తనూషు ని వివిశుః పునః || 10-056-04
సహోభిర్ విశ్వమ్ పరి చక్రమూ రజః పూర్వా ధామాన్య్ అమితా మిమానాః |
తనూషు విశ్వా భువనా ని యేమిరే ప్రాసారయన్త పురుధ ప్రజా అను || 10-056-05
ద్విధా సూనవో ऽసురం స్వర్విదమ్ ఆస్థాపయన్త తృతీయేన కర్మణా |
స్వామ్ ప్రజామ్ పితరః పిత్ర్యం సహ ఆవరేష్వ్ అదధుస్ తన్తుమ్ ఆతతమ్ || 10-056-06
నావా న క్షోదః ప్రదిశః పృథివ్యాః స్వస్తిభిర్ అతి దుర్గాణి విశ్వా |
స్వామ్ ప్రజామ్ బృహదుక్థో మహిత్వావరేష్వ్ అదధాద్ ఆ పరేషు || 10-056-07
