ప్ర వో మహే మన్దమానాయాన్ధసో ऽర్చా విశ్వానరాయ విశ్వాభువే |
ఇన్ద్రస్య యస్య సుమఖం సహో మహి శ్రవో నృమ్ణం చ రోదసీ సపర్యతః || 10-050-01
సో చిన్ ను సఖ్యా నర్య ఇన స్తుతశ్ చర్కృత్య ఇన్ద్రో మావతే నరే |
విశ్వాసు ధూర్షు వాజకృత్యేషు సత్పతే వృత్రే వాప్స్వ్ అభి శూర మన్దసే || 10-050-02
కే తే నర ఇన్ద్ర యే త ఇషే యే తే సుమ్నం సధన్యమ్ ఇయక్షాన్ |
కే తే వాజాయాసుర్యాయ హిన్విరే కే అప్సు స్వాసూర్వరాసు పౌంస్యే || 10-050-03
భువస్ త్వమ్ ఇన్ద్ర బ్రహ్మణా మహాన్ భువో విశ్వేషు సవనేషు యజ్ఞియః |
భువో నౄంశ్ చ్యౌత్నో విశ్వస్మిన్ భరే జ్యేష్ఠశ్ చ మన్త్రో విశ్వచర్షణే || 10-050-04
అవా ను కం జ్యాయాన్ యజ్ఞవనసో మహీం త ఓమాత్రాం కృష్టయో విదుః |
అసో ను కమ్ అజరో వర్ధాశ్ చ విశ్వేద్ ఏతా సవనా తూతుమా కృషే || 10-050-05
ఏతా విశ్వా సవనా తూతుమా కృషే స్వయం సూనో సహసో యాని దధిషే |
వరాయ తే పాత్రం ధర్మణే తనా యజ్ఞో మన్త్రో బ్రహ్మోద్యతం వచః || 10-050-06
యే తే విప్ర బ్రహ్మకృతః సుతే సచా వసూనాం చ వసునశ్ చ దావనే |
ప్ర తే సుమ్నస్య మనసా పథా భువన్ మదే సుతస్య సోమ్యస్యాన్ధసః || 10-050-07
