రథం యాన్తం కుహ కో హ వాం నరా ప్రతి ద్యుమన్తం సువితాయ భూషతి |
ప్రాతర్యావాణం విభ్వం విశే-విశే వస్తోర్-వస్తోర్ వహమానం ధియా శమి || 10-040-01
కుహ స్విద్ దోషా కుహ వస్తోర్ అశ్వినా కుహాభిపిత్వం కరతః కుహోషతుః |
కో వాం శయుత్రా విధవేవ దేవరమ్ మర్యం న యోషా కృణుతే సధస్థ ఆ || 10-040-02
ప్రాతర్ జరేథే జరణేవ కాపయా వస్తోర్-వస్తోర్ యజతా గచ్ఛథో గృహమ్ |
కస్య ధ్వస్రా భవథః కస్య వా నరా రాజపుత్రేవ సవనావ గచ్ఛథః || 10-040-03
యువామ్ మృగేవ వారణా మృగణ్యవో దోషా వస్తోర్ హవిషా ని హ్వయామహే |
యువం హోత్రామ్ ఋతుథా జుహ్వతే నరేషం జనాయ వహథః శుభస్ పతీ || 10-040-04
యువాం హ ఘోషా పర్య్ అశ్వినా యతీ రాజ్ఞ ఊచే దుహితా పృచ్ఛే వాం నరా |
భూతమ్ మే అహ్న ఉత భూతమ్ అక్తవే ऽశ్వావతే రథినే శక్తమ్ అర్వతే || 10-040-05
యువం కవీ ష్ఠః పర్య్ అశ్వినా రథం విశో న కుత్సో జరితుర్ నశాయథః |
యువోర్ హ మక్షా పర్య్ అశ్వినా మధ్వ్ ఆసా భరత నిష్కృతం న యోషణా || 10-040-06
యువం హ భుజ్యుం యువమ్ అశ్వినా వశం యువం శిఞ్జారమ్ ఉశనామ్ ఉపారథుః |
యువో రరావా పరి సఖ్యమ్ ఆసతే యువోర్ అహమ్ అవసా సుమ్నమ్ ఆ చకే || 10-040-07
యువం హ కృశం యువమ్ అశ్వినా శయుం యువం విధన్తం విధవామ్ ఉరుష్యథః |
యువం సనిభ్య స్తనయన్తమ్ అశ్వినాప వ్రజమ్ ఊర్ణుథః సప్తాస్యమ్ || 10-040-08
జనిష్ట యోషా పతయత్ కనీనకో వి చారుహన్ వీరుధో దంసనా అను |
ఆస్మై రీయన్తే నివనేవ సిన్ధవో ऽస్మా అహ్నే భవతి తత్ పతిత్వనమ్ || 10-040-09
జీవం రుదన్తి వి మయన్తే అధ్వరే దీర్ఘామ్ అను ప్రసితిం దీధియుర్ నరః |
వామమ్ పితృభ్యో య ఇదం సమేరిరే మయః పతిభ్యో జనయః పరిష్వజే || 10-040-10
న తస్య విద్మ తద్ ఉ షు ప్ర వోచత యువా హ యద్ యువత్యాః క్షేతి యోనిషు |
ప్రియోస్రియస్య వృషభస్య రేతినో గృహం గమేమాశ్వినా తద్ ఉశ్మసి || 10-040-11
ఆ వామ్ అగన్ సుమతిర్ వాజినీవసూ న్య్ అశ్వినా హృత్సు కామా అయంసత |
అభూతం గోపా మిథునా శుభస్ పతీ ప్రియా అర్యమ్ణో దుర్యాఅశీమహి || 10-040-12
తా మన్దసానా మనుషో దురోణ ఆ ధత్తం రయిం సహవీరం వచస్యవే |
కృతం తీర్థం సుప్రపాణం శుభస్ పతీ స్థాణుమ్ పథేష్ఠామ్ అప దుర్మతిం హతమ్ || 10-040-13
క్వ స్విద్ అద్య కతమాస్వ్ అశ్వినా విక్షు దస్రా మాదయేతే శుభస్ పతీ |
క ఈం ని యేమే కతమస్య జగ్మతుర్ విప్రస్య వా యజమానస్య వా గృహమ్ || 10-040-14
