వనే న వా యో న్య్ అధాయి చాకఞ్ ఛుచిర్ వాం స్తోమో భురణావ్ అజీగః |
యస్యేద్ ఇన్ద్రః పురుదినేషు హోతా నృణాం నర్యో నృతమః క్షపావాన్ || 10-029-01
ప్ర తే అస్యా ఉషసః ప్రాపరస్యా నృతౌ స్యామ నృతమస్య నృణామ్ |
అను త్రిశోకః శతమ్ ఆవహన్ నౄన్ కుత్సేన రథో యో అసత్ ససవాన్ || 10-029-02
కస్ తే మద ఇన్ద్ర రన్త్యో భూద్ దురో గిరో అభ్య్ ఉగ్రో వి ధావ |
కద్ వాహో అర్వాగ్ ఉప మా మనీషా ఆ త్వా శక్యామ్ ఉపమం రాధో అన్నైః || 10-029-03
కద్ ఉ ద్యుమ్నమ్ ఇన్ద్ర త్వావతో నౄన్ కయా ధియా కరసే కన్ న ఆగన్ |
మిత్రో న సత్య ఉరుగాయ భృత్యా అన్నే సమస్య యద్ అసన్ మనీషాః || 10-029-04
ప్రేరయ సూరో అర్థం న పారం యే అస్య కామం జనిధా ఇవ గ్మన్ |
గిరశ్ చ యే తే తువిజాత పూర్వీర్ నర ఇన్ద్ర ప్రతిశిక్షన్త్య్ అన్నైః || 10-029-05
మాత్రే ను తే సుమితే ఇన్ద్ర పూర్వీ ద్యౌర్ మజ్మనా పృథివీ కావ్యేన |
వరాయ తే ఘృతవన్తః సుతాసః స్వాద్మన్ భవన్తు పీతయే మధూని || 10-029-06
ఆ మధ్వో అస్మా అసిచన్న్ అమత్రమ్ ఇన్ద్రాయ పూర్ణం స హి సత్యరాధాః |
స వావృధే వరిమన్న్ ఆ పృథివ్యా అభి క్రత్వా నర్యః పౌంస్యైశ్ చ || 10-029-07
వ్య్ ఆనళ్ ఇన్ద్రః పృతనాః స్వోజా ఆస్మై యతన్తే సఖ్యాయ పూర్వీః |
ఆ స్మా రథం న పృతనాసు తిష్ఠ యమ్ భద్రయా సుమత్యా చోదయాసే || 10-029-08
