యజామహ ఇన్ద్రం వజ్రదక్షిణం హరీణాం రథ్యం వివ్రతానామ్ |
ప్ర శ్మశ్రు దోధువద్ ఊర్ధ్వథా భూద్ వి సేనాభిర్ దయమానో వి రాధసా || 10-023-01
హరీ న్వ్ అస్య యా వనే విదే వస్వ్ ఇన్ద్రో మఘైర్ మఘవా వృత్రహా భువత్ |
ఋభుర్ వాజ ఋభుక్షాః పత్యతే శవో ऽవ క్ష్ణౌమి దాసస్య నామ చిత్ || 10-023-02
యదా వజ్రం హిరణ్యమ్ ఇద్ అథా రథం హరీ యమ్ అస్య వహతో వి సూరిభిః |
ఆ తిష్ఠతి మఘవా సనశ్రుత ఇన్ద్రో వాజస్య దీర్ఘశ్రవసస్ పతిః || 10-023-03
సో చిన్ ను వృష్టిర్ యూథ్యా స్వా సచాఇన్ద్రః శ్మశ్రూణి హరితాభి ప్రుష్ణుతే |
అవ వేతి సుక్షయం సుతే మధూద్ ఇద్ ధూనోతి వాతో యథా వనమ్ || 10-023-04
యో వాచా వివాచో మృధ్రవాచః పురూ సహస్రాశివా జఘాన |
తత్-తద్ ఇద్ అస్య పౌంస్యం గృణీమసి పితేవ యస్ తవిషీం వావృధే శవః || 10-023-05
స్తోమం త ఇన్ద్ర విమదా అజీజనన్న్ అపూర్వ్యమ్ పురుతమం సుదానవే |
విద్మా హ్య్ అస్య భోజనమ్ ఇనస్య యద్ ఆ పశుం న గోపాః కరామహే || 10-023-06
మాకిర్ న ఏనా సఖ్యా వి యౌషుస్ తవ చేన్ద్ర విమదస్య చ ఋషేః |
విద్మా హి తే ప్రమతిం దేవ జామివద్ అస్మే తే సన్తు సఖ్యా శివాని || 10-023-07
