అపేహి మనసస్ పతే ऽప క్రామ పరశ్ చర |
పరో నిరృత్యా ఆ చక్ష్వ బహుధా జీవతో మనః || 10-164-01
భద్రం వై వరం వృణతే భద్రం యుఞ్జన్తి దక్షిణమ్ |
భద్రం వైవస్వతే చక్షుర్ బహుత్రా జీవతో మనః || 10-164-02
యద్ ఆశసా నిఃశసాభిశసోపారిమ జాగ్రతో యత్ స్వపన్తః |
అగ్నిర్ విశ్వాన్య్ అప దుష్కృతాన్య్ అజుష్టాన్య్ ఆరే అస్మద్ దధాతు || 10-164-03
యద్ ఇన్ద్ర బ్రహ్మణస్ పతే ऽభిద్రోహం చరామసి |
ప్రచేతా న ఆఙ్గిరసో ద్విషతామ్ పాత్వ్ అంహసః || 10-164-04
అజైష్మాద్యాసనామ చాభూమానాగసో వయమ్ |
జాగ్రత్స్వప్నః సంకల్పః పాపో యం ద్విష్మస్ తం స ఋచ్ఛతు యో నో ద్వేష్టి తమ్ ఋచ్ఛతు || 10-164-05
