అగ్నే తవ శ్రవో వయో మహి భ్రాజన్తే అర్చయో విభావసో |
బృహద్భానో శవసా వాజమ్ ఉక్థ్యం దధాసి దాశుషే కవే || 10-140-01
పావకవర్చాః శుక్రవర్చా అనూనవర్చా ఉద్ ఇయర్షి భానునా |
పుత్రో మాతరా విచరన్న్ ఉపావసి పృణక్షి రోదసీ ఉభే || 10-140-02
ఊర్జో నపాజ్ జాతవేదః సుశస్తిభిర్ మన్దస్వ ధీతిభిర్ హితః |
త్వే ఇషః సం దధుర్ భూరివర్పసశ్ చిత్రోతయో వామజాతాః || 10-140-03
ఇరజ్యన్న్ అగ్నే ప్రథయస్వ జన్తుభిర్ అస్మే రాయో అమర్త్య |
స దర్శతస్య వపుషో వి రాజసి పృణక్షి సానసిం క్రతుమ్ || 10-140-04
ఇష్కర్తారమ్ అధ్వరస్య ప్రచేతసం క్షయన్తం రాధసో మహః |
రాతిం వామస్య సుభగామ్ మహీమ్ ఇషం దధాసి సానసిం రయిమ్ || 10-140-05
ఋతావానమ్ మహిషం విశ్వదర్శతమ్ అగ్నిం సుమ్నాయ దధిరే పురో జనాః |
శ్రుత్కర్ణం సప్రథస్తమం త్వా గిరా దైవ్యమ్ మానుషా యుగా || 10-140-06
