అరణ్యకాండము - సర్గము 72
శ్రీమద్వాల్మీకియరామాయణే అరణ్యకాండే ద్విసప్తతితమః సర్గః |౩-౭౨|
| వాల్మీకి రామాయణము | ||||||||||
|---|---|---|---|---|---|---|---|---|---|---|
| ||||||||||
ఏవం ఉక్తౌ తు తౌ వీరౌ కబంధేన నర ఈశ్వరౌ |
గిరి ప్రదరం ఆసాద్య పావకం విససర్జతుః |౩-౭౨-౧|
లక్ష్మణః తు మహా ఉల్కాభిః జ్వలితాభిః సమంతతః |
చితాం ఆదీపయామాస సా ప్రజజ్వాల సర్వతః |౩-౭౨-౨|
తత్ శరీరం కబంధస్య ఘృత పిణ్డ ఉపమం మహత్ |
మేదసా పచ్యమానస్య మందం దహతి పావకః |౩-౭౨-౩|
స విధూయ చితాం ఆశు విధూమో అగ్నిర్ ఇవ ఉత్థితః |
అరజే వాససీ బిభ్రత్ మాలాం దివ్యాం మహాబలః |౩-౭౨-౪|
తతః చితాయా వేగేన భాస్వరో విరజ అంబరః |
ఉత్పపాత ఆశు సంహృష్టః సర్వ ప్రత్యంగ భూషణః |౩-౭౨-౫|
విమానే భాస్వరే తిష్ఠన్ హంస యుక్తే యశస్ కరే |
ప్రభయా చ మహాతేజా దిశో దశ విరాజయన్ |౩-౭౨-౬|
సో అంతరిక్ష గతో వాక్యం కబంధో రామం అబ్రవీత్ |
శృణు రాఘవ తత్త్వేన యథా సీమాం అవాప్స్యసి |౩-౭౨-౭|
రామ షడ్ యుక్తయో లోకే యాభిః సర్వం విమృశ్యతే |
పరిమృష్టో దశ అంతేన దశ ఆభాగేన సేవ్యతే |౩-౭౨-౮|
దశ ఆభాగ గతో హీనః త్వం రామ సహ లక్ష్మణః |
యత్ కృతే వ్యసనం ప్రాప్తం త్వయా దార ప్రధర్షణం |౩-౭౨-౯|
తత్ అవశ్యం త్వయా కార్యః స సుహృత్ సుహృదాం వర |
అకృత్వా న హి తే సిద్ధిం అహం పశ్యామి చింతయన్ |౩-౭౨-౧౦|
శ్రూయతాం రామ వక్ష్యామి సుగ్రీవో నామ వానరః |
భ్రాత్రా నిరస్తః క్రుద్ధేన వాలినా శక్ర సూనునా |౩-౭౨-౧౧|
ఋష్యమూకే గిరి వరే పంపా పర్యంత శోభితే |
నివసతి ఆత్మవాన్ వీరః చతుర్భిః సహ వానరైః |౩-౭౨-౧౨|
వానరేంద్రో మహావీర్యః తేజోవాన్ అమిత ప్రభః |
సత్య సంధో వినీతః చ ధృతిమాన్ మతిమాన్ మహాన్ |౩-౭౨-౧౩|
దక్షః ప్రగల్భో ద్యుతిమాన్ మహా బల పరాక్రమః |
భ్రాతా వివాసితో వీర రాజ్య హేతో మహాత్మనా |౩-౭౨-౧౪|
స తే సహాయో మిత్రం చ సీతాయాః పరిమార్గణే |
భవిష్యతి హి తే రామ మా చ శోకే మనః కృధాః |౩-౭౨-౧౫|
భవితవ్యం హి యత్ చ అపి న తత్ శక్యం ఇహ అన్యథా |
కర్తుం ఇక్ష్వాకు శార్దూల కాలో హి దుర్రక్రమః |౩-౭౨-౧౬|
గచ్ఛ శీఘ్రం ఇతో వీర సుగ్రీవం తం మహాబలం |
వయస్యం తం కురు క్షిప్రం ఇతో గత్వా అద్య రాఘవ |౩-౭౨-౧౭|
అద్రోహాయ సమాగమ్య దీప్యమానే విభావసౌ |
న చ తే సో అవమంతవ్యః సుగ్రీవో వానర అధిపః |౩-౭౨-౧౮|
కృతజ్ఞః కామ రూపీ చ సహాయ అర్థీ చ వీర్యవాన్ |
శక్తౌ హి అద్య యువాం కర్తుం కార్యం తస్య చికీర్షితం |౩-౭౨-౧౯|
కృతార్థో వా అకృతార్థో వా తవ కృత్యం కరిష్యతి |
స ఋక్షరజసః పుత్రః పంపాం అటతి శంకితః |౩-౭౨-౨౦|
భాస్కరస్య ఔరసః పుత్రో వాలినా కృత కిల్బిషః |
సంనిధాయ ఆయుధం క్షిప్రం ఋష్యమూక ఆలయం కపిం |౩-౭౨-౨౧|
కురు రాఘవ సత్యేన వయస్యం వన చారిణం |
స హి స్థానాని సర్వాణి కార్త్స్న్యేన కపి కుంజరః |౩-౭౨-౨౨|
నర మాంస అశినాం లోకే నైపుణ్యాత్ అధిగచ్ఛతి |
న తస్య అవిదితం లోకే కించిత్ అస్తి హి రాఘవ |౩-౭౨-౨౩|
యావత్ సూర్యః ప్రతపతి సహస్రాంశుః అరిందమ |
స నదీః విపులాన్ శైలాన్ గిరి దుర్గాణి కందరాన్ |౩-౭౨-౨౪|
అన్విష్య వానరైః సార్ధం పత్నీం తే అధిగమిష్యతి |
వానరాన్ చ మహాకాయాన్ ప్రేషయిష్యతి రాఘవ |౩-౭౨-౨౫|
దిశో విచేతుం తాం సీతాం త్వత్ వియోగేన శోచయతీం |
అన్వేష్యతి వరారోహాం మైథిలీం రావణ ఆలయే |౩-౭౨-౨౬|
స మేరు శృంగ అగ్ర గతాం అనిందితాం
ప్రవిశ్య పాతాల తలే అపి వా ఆశ్రితాం |
ప్లవంగమానాం ఋషభః తవ ప్రియాం
నిహత్య రక్షాంసి పునః ప్రదాస్యతి |౩-౭౨-౨౭|
ఇతి వాల్మీకి రామాయణే ఆది కావ్యే అరణ్యకాండే ద్విసప్తతితమః సర్గః |౩-౭౨|