అధర్వణవేదము - కాండము 14 - సూక్తము 2

←ముందరి అధ్యాయము

అధర్వణవేదము (అధర్వణవేదము - కాండము 14 - సూక్తము 2)

తరువాతి అధ్యాయము→

తుభ్యమగ్రే పర్యవహన్త్సూర్యాం వహతునా సహ |

స నః పతిభ్యో జాయాం దా అగ్నే ప్రజయా సహ ||1||

పునః పత్నీమగ్నిరదాదాయుషా సహ వర్చసా |

దీర్ఘాయురస్యా యః పతిర్జీవాతి శరదః శతమ్ ||2||

సోమస్య జాయా ప్రథమం గన్ధర్వస్తే ऽపరః పతిః |

తృతీయో అగ్నిష్టే పతిస్తురీయస్తే మనుష్యజాః ||3||

సోమో దదద్గన్ధర్వాయ గన్ధర్వో దదదగ్నయే |

రయిం చ పుత్రాంస్చాదాదగ్నిర్మహ్యమథో ఇమామ్ ||4||

ఆ వామగన్త్సుమతిర్వాజినీవసూ న్యశ్వినా హృత్సు కామా అరంసత |

అభూతం గోపా మిథునా శుభస్పతీ ప్రియా అర్యమ్ణో దుర్యాఁ అశీమహి ||5||

సా మన్దసానా మనసా శివేన రయిం ధేహి సర్వవీరం వచస్యమ్ |

సుగం తీర్థం సుప్రపాణం శుభస్పతీ స్థాణుం పథిష్ఠామప దుర్మతిం హతమ్ ||6||

యా ఓషధయో యా నద్యో3 యాని క్షేత్రాణి యా వనా |

తాస్త్వా వధు ప్రజావతీం పత్యే రక్షన్తు రక్షసః ||7||

ఏమం పన్థామరుక్షామ సుగం స్వస్తివాహనమ్ |

యస్మిన్వీరో న రిష్యత్యన్యేషాం విన్దతే వసు ||8||

ఇదం సు మే నరః శృణుత యయాశిషా దంపతీ వామమశ్నుతః |

యే గన్ధర్వా అప్సరసశ్చ దేవీరేషు వానస్పత్యేషు యే ऽధి తస్థుః |

స్యోనాస్తే అస్యై వధ్వై భవన్తు మా హింసిషుర్వహతుముహ్యమానమ్ ||9||

యే వధ్వశ్చన్ద్రం వహతుం యక్ష్మా యన్తి జనాఁ అను |

పునస్తాన్యజ్ఞియా దేవా నయన్తు యత ఆగతాః ||10||

మా విదన్పరిపన్థినో య ఆసీదన్తి దంపతీ |

సుగేన దుర్గమతీతామప ద్రాన్త్వరాతయః ||11||

సం కాశయామి వహతుం బ్రహ్మణా గృహైరఘోరేణ చక్షుషా మిత్రియేణ |

పర్యాణద్ధం విశ్వరూపం యదస్తి స్యోనం పతిభ్యః సవితా తత్కృణోతు ||12||

శివా నారీయమస్తమాగన్నిమం ధాతా లోకమస్యై దిదేశ |

తామర్యమా భగో అశ్వినోభా ప్రజాపతిః ప్రజయా వర్ధయన్తు ||13||

ఆత్మన్వత్యుర్వరా నారీయమాగన్తస్యాం నరో వపత బీజమస్యామ్ |

సా వః ప్రజాం జనయద్వక్షణాభ్యో బిభ్రతీ దుగ్ధమృషభస్య రేతః ||14||

ప్రతి తిష్ఠ విరాడసి విష్ణురివేహ సరస్వతి |

సినీవాలి ప్ర జాయతాం భగస్య సుమతావసత్ ||15||

ఉద్వ ఊర్మిః శమ్యా హన్త్వాపో యోక్త్రాణి ముఞ్చత |

మాదుష్కృతౌ వ్యేనసావఘ్న్యావశునమారతామ్ ||16||

అఘోరచక్షురపతిఘ్నీ స్యోనా శగ్మా సుశేవా సుయమా గృహేభ్యః |

వీరసూర్దేవృకామా సం త్వయైధిషీమహి సుమస్యమానా ||17||

అదేవృఘ్న్యపతిఘ్నీహైధి శివా పశుభ్యః సుయమా సువర్చాహ్ |

ప్రజావతీ వీరసూర్దేవృకామా స్యోనేమమగ్నిం గార్హపత్యం సపర్య ||18||

ఉత్తిష్ఠేతః కిమిఛన్తీదమాగా అహం త్వేడే అభిభూః స్వాద్గృహాత్ |

శూన్యైషీ నిరృతే యాజగన్థోత్తిష్ఠారాతే ప్ర పత మేహ రంస్థాః ||19||

యదా గార్హపత్యమసపర్యైత్పూర్వమగ్నిం వధూరియమ్ |

అధా సరస్వత్యై నారి పితృభ్యశ్చ నమస్కురు ||20||

శర్మ వర్మైతదా హరాస్యై నార్యా ఉపస్తిరే |

సినీవాలి ప్ర జాయతాం భగస్య సుమతావసత్ ||21||

యం బల్బజం న్యస్యథ చర్మ చోపస్తృణీథన |

తదా రోహతు సుప్రజా యా కన్యా విన్దతే పతిమ్ ||22||

ఉప స్తృణీహి బల్బజమధి చర్మణి రోహితే |

తత్రోపవిశ్య సుప్రజా ఇమమగ్నిం సపర్యతు ||23||

ఆ రోహ చర్మోప సీదాగ్నిమేష దేవో హన్తి రక్షాంసి సర్వా |

ఇహ ప్రజాం జనయ పత్యే అస్మై సుజ్యైష్ఠ్యో భవత్పుత్రస్త ఏషః ||24||

వి తిష్ఠన్తాం మాతురస్యా ఉపస్థాన్నానారూపాః పశవో జాయమానాః |

సుమఙ్గల్యుప సీదేమమగ్నిం సంపత్నీ ప్రతి భూషేహ దేవాన్ ||25||

సుమఙ్గలీ ప్రతరణీ గృహాణాం సుశేవా పత్యే శ్వశురాయ శంభూః |

స్యోనా శ్వశ్ర్వై ప్ర గృహాన్విశేమాన్ ||26||

స్యోనా భవ శ్వశురేభ్యః స్యోనా పత్యే గృహేభ్యః |

స్యోనాస్యై సర్వస్యై విశే స్యోనా పుష్టాయైషాం భవ ||27||

సుమఙ్గలీరియం వధూరిమాం సమేత పశ్యత |

సౌభాగ్యమస్యై దత్త్వా దౌర్భాగ్యైర్విపరేతన ||28||

యా దుర్హార్దో యువతయో యాశ్చేహ జరతీరపి |

వర్చో న్వస్యై సం దత్తాథాస్తం విపరేతన ||29||

రుక్మప్రస్తరణం వహ్యం విశ్వా రూపాణి బిభ్రతమ్ |

ఆరోహత్సూర్యా సావిత్రీ బృహతే సౌభగాయ కమ్ ||30||

ఆ రోహ తల్పం సుమనస్యమానేహ ప్రజాం జనయ పత్యే అస్మై |

ఇన్ద్రాణీవ సుబుధా బుధ్యమానా జ్యోతిరగ్రా ఉషసః ప్రతి జాగరాసి ||31||

దేవా అగ్రే న్యపద్యన్త పత్నీః సమస్పృశన్త తన్వస్తనూభిః |

సూర్యేవ నారి విశ్వరూపా మహిత్వా ప్రజావతీ పత్యా సం భవేహ ||32||

ఉత్తిష్ఠేతో విశ్వావసో నమసేడామహే త్వా |

జామిమిఛ పితృషదం న్యక్తాం స తే భాగో జనుషా తస్య విద్ధి ||33||

అప్సరసః సధమాదం మదన్తి హవిర్ధానమన్తరా సూర్యం చ |

తాస్తే జనిత్రమభి తాః పరేహి నమస్తే గన్ధర్వర్తునా కృణోమి ||34||

నమో గన్ధర్వస్య నమసే నమో భామాయ చక్షుషే చ కృణ్మః |

విశ్వావసో బ్రహ్మణా తే నమో ऽభి జాయా అప్సరసః పరేహి ||35||

రాయా వయం సుమనసః స్యామోదితో గన్ధర్వమావీవృతామ |

అగన్త్స దేవః పరమం సధస్థమగన్మ యత్ర ప్రతిరన్త ఆయుః ||36||

సం పితరావృత్వియే సృజేథాం మాతా పితా చ రేతసో భవాథః |

మర్య ఇవ యోషామధి రోహయైనాం ప్రజాం కృణ్వాథామిహ పుష్యతం రయిమ్ ||37||

తాం పూషం ఛివతమామేరయస్వ యస్యాం బీజం మనుష్యా3 వపన్తి |

యా న ఊరూ ఉశతీ విశ్రయాతి యస్యాముశన్తః ప్రహరేమ శేపః ||38||

ఆ రోహోరుముప ధత్స్వ హస్తం పరి ష్వజస్వ జాయాం సుమనస్యమానః |

ప్రజాం కృణ్వాథామిహ మోదమానౌ దీర్ఘం వామాయుః సవితా కృణోతు ||39||

ఆ వాం ప్రజాం జనయతు ప్రజాపతిరహోరాత్రాభ్యాం సమనక్త్వర్యమా |

అదుర్మఙ్గలీ పతిలోకమా విశేమం శం నో భవ ద్విపదే శం చతుష్పదే ||40||

దేవైర్దత్తం మనునా సాకమేతద్వాధూయం వాసో వధ్వశ్చ వస్త్రమ్ |

యో బ్రహ్మణే చికితుషే దదాతి స ఇద్రక్షాంసి తల్పాని హన్తి ||41||

యం మే దత్తో బ్రహ్మభాగం వధూయోర్వాధూయం వాసో వధ్వశ్చ వస్త్రమ్ |

యువం బ్రహ్మణే ऽనుమన్యమానౌ బృహస్పతే సాకమిన్ద్రశ్చ దత్తమ్ ||42||

స్యోనాద్యోనేరధి బధ్యమానౌ హసాముదౌ మహసా మోదమానౌ |

సుగూ సుపుత్రౌ సుగృహౌ తరాథో జీవావుషసో విభాతీః ||43||

నవం వసానః సురభిః సువాసా ఉదాగాం జీవ ఉషసో విభాతీః |

ఆణ్డాత్పతత్రీవాముక్షి విశ్వస్మాదేనసస్పరి ||44||

శుమ్భనీ ద్యావాపృథివీ అన్తిసుమ్నే మహివ్రతే |

ఆపః సప్త సుస్రువుర్దేవీస్తా నో ముఞ్చన్త్వంహసః ||45||

సూర్యాయై దేవేభ్యో మిత్రాయ వరుణాయ చ |

యే భూతస్య ప్రచేతసస్తేభ్య ఇదమకరం నమః ||46||

య ఋతే చిదభిశ్రిషః పురా జత్రుభ్య ఆతృదః |

సంధాతా సంధిం మఘవా పురూవసుర్నిష్కర్తా విహ్రుతం పునః ||47||

అపాస్మత్తమ ఉఛతు నీలం పిశఙ్గముత లోహితం యత్ |

నిర్దహనీ యా పృషాతక్యస్మిన్తాం స్థాణావధ్యా సజామి ||48||

యావతీః కృత్యా ఉపవాసనే యావన్తో రాజ్ఞో వరుణస్య పాశాః |

వ్యృద్ధయో యా అసమృద్ధయో యా అస్మిన్తా స్థాణావధి సాదయామి ||49||

యా మే ప్రియతమా తనూః సా మే బిభాయ వాససః |

తస్యాగ్రే త్వం వనస్పతే నీవిం కృణుష్వ మా వయం రిషామ ||50||

యే అన్తా యావతీః సిచో య ఓతవో యే చ తన్తవః |

వాసో యత్పత్నీభిరుతం తన్న స్యోనముప స్పృశాత్ ||51||

ఉశతీః కన్యలా ఇమాః పితృలోకాత్పతిం యతీః |

అవ దీక్షామసృక్షత స్వాహా ||52||