అధర్వణవేదము - కాండము 11 - సూక్తము 5
| ←ముందరి అధ్యాయము | అధర్వణవేదము (అధర్వణవేదము - కాండము 11 - సూక్తము 5) | తరువాతి అధ్యాయము→ |
బ్రహ్మచారీష్ణంశ్చరతి రోదసీ ఉభే తస్మిన్దేవాః సంమనసో భవన్తి |
స దాధార పృథివీం దివం చ స ఆచార్యం తపసా పిపర్తి ||
బ్రహ్మచారిణం పితరో దేవజనాః పృథగ్దేవా అనుసంయన్తి సర్వే |
గన్ధర్వా ఏనమన్వాయన్త్రయస్త్రింశత్త్రిశతాహ్షట్సహస్రాః సర్వాన్త్స దేవాంస్తపసా పిపర్తి ||
ఆచార్య ఉపనయమానో బ్రహ్మచారిణం కృణుతే గర్భమన్తః |
తమ్రాత్రీస్తిస్ర ఉదరే బిభర్తి తం జాతం ద్రష్టుమభిసంయన్తి దేవాః ||
ఇయం సమిత్పృథివీ ద్యౌర్ద్వితీయోతాన్తరిక్షం సమిధా పృణాతి |
బ్రహ్మచారీ సమిధా మేఖలయా శ్రమేణ లోకాంస్తపసా పిపర్తి ||
పూర్వో జాతో బ్రహ్మణో బ్రహ్మచారీ ఘర్మం వసానస్తపసోదతిష్ఠత్ |
తస్మాజ్జాతం బ్రాహ్మణం బ్రహ్మ జ్యేష్ఠం దేవాశ్చ సర్వే అమృతేన సాకమ్ ||
బ్రహ్మచార్యేతి సమిధా సమిద్ధః కార్ష్ణం వసానో దీక్షితో దీర్ఘశ్మశ్రుః |
స సద్య ఏతి పూర్వస్మాదుత్తరం సముద్రం లోకాన్త్సమ్గృభ్య ముహురాచరిక్రత్ ||
బ్రహ్మచారీ జనయన్బ్రహ్మాపో లోకం ప్రజాపతిం పరమేష్ఠినమ్విరాజమ్ |
గర్భో భూత్వామృతస్య యోనావిన్ద్రో హ భూత్వాసురాంస్తతర్హ ||
ఆచార్యస్తతక్ష నభసీ ఉభే ఇమే ఉర్వీ గమ్భీరే పృథివీం దివం చ |
తే రక్షతి తపసా బ్రహ్మచారీ తస్మిన్దేవాః సంమనసో భవన్తి ||
ఇమాం భూమిం పృథివీం బ్రహ్మచారీ భిక్షామా జభార ప్రథమో దివం చ |
తే కృత్వా సమిధావుపాస్తే తయోరార్పితా భువనాని విశ్వా ||
అర్వాగన్యః పరో అన్యో దివస్పృష్ఠాద్గుహా నిధీ నిహితౌ బ్రాహ్మణస్య |
తౌ రక్షతి తపసా బ్రహ్మచారీ తత్కేవలం కృణుతే బ్రహ్మ విద్వాన్ ||
అర్వాగన్య ఇతో అన్యః పృథివ్యా అగ్నీ సమేతో నభసీ అన్తరేమే |
తయోః శ్రయన్తే రశ్మయో ऽధి దృఢాస్తానా తిష్ఠతి తపసా బ్రహ్మచారీ ||
అభిక్రన్దన్స్తనయన్నరుణః శితిఙ్గో బృహచ్ఛేపో ऽను భూమౌ జభార |
బ్రహ్మచారీ సిఞ్చతి సానౌ రేతః పృథివ్యాం తేన జీవన్తి ప్రదిశశ్చతస్రః ||
అగ్నౌ సూర్యే చన్ద్రమసి మాతరిశ్వన్బ్రహ్మచార్యప్సు సమిధమా దధాతి |
తాసామర్చీషి పృథగభ్రే చరన్తి తాసామాజ్యం పురుషో వర్షమాపః ||
ఆచార్యో మృత్యుర్వరుణః సోమో ఓషధయః పయః |
జీభూతా ఆసన్త్సత్వానస్తైరిదం స్వరాభృతమ్ ||
అమా ఘృతం కృణుతే కేవలమాచార్యో భూత్వా వరుణో యద్యదైఛత్ప్రజాపతౌ |
తద్బ్రహ్మచారీ ప్రాయఛత్స్వాన్మిత్రో అధ్యాత్మనః ||
ఆచార్యో బ్రహ్మచారీ బ్రహ్మచరీ ప్రజాపతిః |
ప్రజాపతిర్వి రాజతి విరాడిన్ద్రో ऽభవద్వశీ ||
బ్రహ్మచర్యేణ తపసా రాజా రాష్ట్రం వి రక్షతి |
ఆచార్యో బ్రహ్మచర్యేణ బ్రహ్మచారిణమిఛతే ||
బ్రహ్మచర్యేణ కన్యా యువానమ్విన్దతే పతిమ్ |
అనడ్వాన్బ్రహ్మచర్యేణాశ్వో ఘాసం జిగీర్షతి ||
బ్రహ్మచర్యేణ తపసా దేవా మృత్యుమపాఘ్నత |
ఇన్ద్రో హ బ్రహ్మచర్యేణ దేవేభ్యః స్వరాభరత్ ||
ఓషధయో భూతభవ్యమహోరాత్రే వనస్పతిః |
సంవత్సరః సహ ర్తుభిస్తే జాతా బ్రహ్మచారిణః ||
పార్థివా దివ్యాః పశవ ఆరణ్యా గ్రామ్యాశ్చ యే |
అపక్షాః పక్షిణశ్చ యే తే జాతా బ్రహ్మచారిణః ||
పృథక్సర్వే ప్రాజాపత్యాః ప్రాణానాత్మసు బిభ్రతి |
తాన్త్సర్వాన్బ్రహ్మ రక్షతి బ్రహ్మచారిణ్యాభృతమ్ ||
దేవానామేతత్పరిషూతమనభ్యారూఢం చరతి రోచమానమ్ |
తస్మాజ్జాతం బ్రాహ్మణం బ్రహ్మ జ్యేష్ఠం దేవాశ్చ సర్వే అమృతేన సాకమ్ ||
బ్రహ్మచారీ బ్రహ్మ భ్రాజద్బిభర్తి తస్మిన్దేవా అధి విశ్వే సమోతాః |
ప్రాణాపానౌ జనయన్నాద్వ్యానం వాచం మనో హృదయం బ్రహ్మ మేధామ్ ||
చక్షుః శ్రోత్రం యశో అస్మాసు ధేహ్యన్నం రేతో లోహితముదరమ్ |
తాని కల్పన్బ్రహ్మచారీ సలిలస్య పృష్ఠే తపో ऽతిష్ఠత్తప్యమానః సముద్రే |
స స్నాతో బభ్రుః పిఙ్గలః పృథివ్యాం బహు రోచతే ||
| ←ముందరి అధ్యాయము | అధర్వణవేదము | తరువాతి అధ్యాయము→ |