అచ్యుతాష్టకం

అచ్యుతం కేశవం రామ నారాయణం

కృష్ణదామోదరం వాసుదేవం హరిమ్ |

శ్రీధరం మాధవం గోపికా వల్లభం

జానకీనాయకం రామచంద్రం భజే || 1 ||

అచ్యుతం కేశవం సత్యభామాధవం

మాధవం శ్రీధరం రాధికా౽రాధితమ్ |

ఇందిరామందిరం చేతసా సుందరం

దేవకీనందనం నందజం సందధే || 2 ||

విష్ణవే జిష్ణవే శంఖినే చక్రిణే

రుక్మిణీరాగిణే జానకీజానయే |

వల్లవీ వల్లభా యా౽ర్చితాయాత్మనే

కంసవిధ్వంసినే వంశినే తే నమః || 3 ||

కృష్ణ గోవింద హే రామ నారాయణ

శ్రీపతే వాసుదేవాజిత శ్రీనిధే |

అచ్యుతానంద హే మాధవాధోక్షజ

ద్వారకానాయక ద్రౌపదీరక్షక || 4 ||

రాక్షసక్షోభితః సీతయా శోభితో

దండకారణ్యభూపుణ్యతాకారణమ్ |

లక్ష్మణేనాన్వితో వానరైస్సేవితో

౽గస్త్య సంపూజితో రాఘవః పాతు మామ్ || 5 ||

ధేనుకారిష్టకా‌౽నిష్టికృద్ద్వేషిణాం

కేశిహా కంసహృద్వంశికావాదకః |

పూతనాకోపకః సూరజాఖేలనో

బాలగోపాలకః పాతు మాం సర్వదా || 6 ||

విద్యుదుద్యోతవత్ప్రస్ఫురద్వాససం

ప్రావృడమ్భోదవత్ప్రోల్లసద్విగ్రహమ్ |

వన్యయా మాలయా శోభితోరః స్థలం

లోహితాఙ్ఘ్రిద్వయం వారిజాక్షం భజే || 7 ||

కుంచితైః కుంతలైర్భ్రాజమానాననం

రత్నమౌళిం లసత్కుండలం గండయోః |

హారకేయూరకం కంకణ ప్రోజ్జ్వలం

కింకిణీ మంజులం శ్యామలం తం భజే || 8 ||

అచ్యుతస్యాష్టకం యః పఠేదిష్టదం

ప్రేమతః ప్రత్యహం పూరుషః సస్పృహమ్

వృత్తతః సుందరం కర్తృ విశ్వంభరమ్

తస్య వశ్యో హరిర్జాయతే సత్వరమ్ ||