పుట:కావ్యాలంకారచూడామణి (విన్నకోట పెద్దన).pdf/119

మహాక్కరం బెట్టిదనిన

⁠

వారిజాప్తుండు పంచేంద్రగణములు వనజారియును గూడి వెలయుచుండ నారయ రెండవనాలవచోట్ల నర్కుండయి ననుం దనర్చుచుండఁ గోరి యవ్వడిపంచమగణమునఁ గూడి మొదలు నిలుపంగ నగు సారమై ప్రాసవడి సప్తగణములు సాఁగ మహాక్కర మతిశయిల్లు.

⁠ 53

మధ్యాక్కరం బెట్లనిన

⁠

వరుసతో దేవేంద్రసూర్యవజ్రిరవుల...... విరచించి నాలవపట్టు విశ్రాంతి సదనంబు చేసి తరబడిఁ దప్పక చెప్పఁదగునండ్రు మధ్యాక్కరంబు కరవాలభైరవుపెంపు గణషట్కమున నుతియింప.

⁠ 54

మధురాక్కరం బెట్లనిన

⁠

తరణివాసవత్రితయంబు ధవళభానుయుతి నొంద నిరతి విశ్రాంతి నాలవనెలవున నింపుమీఱ సరసమధురార్థములఁ జెప్పఁ జను మధురాక్కరంబు వరుసఁ బంచగణములను వాలి కృతుల వెలయ.

⁠ 55

అంతరాక్కరం బెట్లనిన

⁠

కమలమిత్రుండు సురరాజగణయుగంబు, కమలశత్రునితోఁ జెంది కందళింప నమరుఁ బ్రావళ్లు నర్ధంబు నతిశయిల్ల, నమల మగునంతరాక్కర మబ్ధిసంఖ్య.

⁠ 56

అల్పాక్కరం బెట్లనిన

⁠

సుమనఃపతియుగము సోముండును, నెమకంగఁ బ్రావళ్లు నిండిమీఱ గమనీయవిభవంబు గాంచు నెప్డు, రమణీయ మల్పాక్కరము కృతుల.[1]

⁠ 57

షట్పది

⁠

సురపతులిరువురు సురపతులిద్దఱు, సురపయుగమ్ముతో సోముండును బరువడిఁ బెసఁగొన నరుదుగ షట్పది, సరిఁబ్రాసములు దనరారంగను.

⁠ 58

చౌపది

⁠

భసగానలములపైని గరంబు, న్నెసఁగఁగ మూఁడవయెడ విరమంబుం బొసఁగినఁ జౌపదిఁ బొలుచు రసంబుల, గసవరముగఁ దగుఁగద ప్రాసంబున్.

⁠ 59

1. ఇది గీతపద్యమువలె నున్నది.