ఈ పుట ఆమోదించబడ్డది
47
శశికళ
గాఢ నిద్రను సోలినవి న
క్షత్ర బాలలు ఒడలు తెలియక
వాని సౌందర్యాల మధ్యను
వాలియున్నది ఒక్క సోయగమూ !
"ప్రేయసీ !" యను నాదు పిలుపును
"ప్రేయసీ !" యను మారుమ్రోతయు
మేలుకొలిపెను తార బాలల
మేలుకొలిపెను సర్వ సృష్టిని !
తారకా బాలికల నడుమను
కోరికల ప్రోవైన నిన్నూ
మేలుకొలిపెను పిలుపు పాటలు
జాలిగా ఆనంద భైరవిలో !
సృష్టి అంతా ఝల్లు మన్నది,
చేష్ట లందెను కాల బాలిక
ఘల్లు మన్నది లోకనాట్యము
ఫుల్లమై రస దివ్య పుష్పము
వెల్లువలు గంధములు నింపెన్.