పద్మపురాణము
ఉత్తరఖండము – ప్రథమాశ్వాసము
శా. |
శ్రీరమ్యంబగు దుగ్ధవార్ధినడుమన్ శేషాహితల్పంబుపై
నారూఢంబుగ నిందిరాసహితుఁడై యానందలీలం గుణా
ధారుండై వరసంయమీంద్రులకు నాత్మజ్ఞానరూపంబు దా
నై రంజిల్లెడు వేల్పు ప్రోచుఁ గృపఁ గందామాత్యు నెల్లప్పుడున్.
| 1
|
చ. |
చెలువగు జూటరంధ్రములఁ జెచ్చెరఁ బిల్లలఁ బెట్టి యింపులన్
వెలయు చకోరదంపతులు వెన్నెల మీఁగడ లంచు ముక్కులం
జెలఁగుచుఁ గుప్పసంబు పొర చింపఁగ మేల్కని చూచు శేషు మే
యలకువఁ గాంచి నవ్వు శివుఁ డబ్బయకందని ధన్యుఁ జేయుతన్.
| 2
|
చ. |
తనకు నివాసమైన వెలిదమ్మిఁ జెలంగెడు చంచరీకని
స్వన మొగి విన్నవారలకు సామకృతాభ్యసనప్రభూతశి
ష్యనినదమో యనంగ నెసలారెడు వేలుపుఁబెద్ద నిత్యశో
భనయుతుఁ జేయుఁ గాతఁ బ్రతిభాన్వితు నౌబళమంత్రికందనిన్.
| 3
|
ఉ. |
వాడనితమ్మిచూలి తలవాకిటఁ గాఁపురముండు దేవి యీ
రేడుజగంబులుం దనకు నిమ్మగు వేడుక బొమ్మరిండ్లుగా
నాడెడు కన్య విప్రులకు నాశ్రయమయ్యెడు పల్కుఁజేడె వా
దోడగుఁ గాత[1] మాకుఁ గృతి దూఁకొను నిశ్చలవాక్యసిద్ధికిన్.
| 4
|
ఉ. |
తొండము మీఁది కెత్తుకొని దోర్యుగళంబునఁ దాళగించుచు
న్గండమదాంబుధారలకుఁ గ్రమ్మెడు తుమ్మెద లొత్తు కాఱుగాఁ
గొండలఱేని కూర్మిసుతకుం బ్రియ మొందఁగ నాడుచున్న వే
దండముఖుండు నవ్యకవితారససూక్తులు మాకు నీవుతన్.
| 5
|
- ↑ మా కృతికి దూకొను నిశ్చల కార్యసిద్ధికిన్ (తి).
తి అనగా శ్రీ వేంకటేశ్వర విశ్వవిద్యాలయ ప్రాచ్యపరిశోధనసంస్థ భాండాగారము నందలి తాళపత్రముల పాఠములు, తిరుపతి.