ఈ పుట అచ్చుదిద్దబడ్డది
రేకు: 0217-06 ఆహిరి సం: 03-095 వైష్ణవ భక్తి
పల్లవి:
ఎట్టయినాఁ జేసుకో ఇఁక నీ చిత్తము నన్ను
పట్టిచ్చె మా గురుఁడు నీ పాదాలు విడువను
చ. 1:
పోఁడిమి నా నామములు పొద్దువొద్దు నుడిగీని
వీఁడేమడుగునోయని వెఱవకుమీ
నాఁడే నా యాచార్యుఁడు నాకు నన్నీ యిచ్చినాఁడు
నేఁడిదేలంటే నతని నేమము నే మానను
చ. 2:
ప్రేమతో వీఁడు నన్నింటఁ బెట్టుక పూజించీని
యేమి గారణమోయని యెంచుకోకుమీ
కామించి యాచార్యుఁడే కారణము నీకు నాకు
యీ మరులేలంటే నాతఁడిచ్చిన సొమ్మే నేను
చ. 3:
పలుమారు వీఁడు నాపై బత్తిచేసీ నేఁటికని
వెలయ శ్రీవేంకటేశ వేసరకుమీ
యెలమి నాచార్యుఁడిదే పని చేసినాఁడు
నిలిచెఁ గలకాలము నీకు నాకుఁ బోదు