ఈ పుట అచ్చుదిద్దబడ్డది
రేకు: 9035-01 భూపాళం సం: 04-554 వేంకటగానం
పల్లవి:
అన్నివిభవముల అతఁడితఁడు
కన్నులు వేవేలుగల ఘనుడితఁడు
చ. 1:
వేదాంతకోట్ల విభుఁ డితఁడు
నాదబ్రహ్మపు నడుమితఁడు
ఆది నంత్యములకు నరుదితఁడు
శ్రీ దేవుఁడు సరసిజ నాభుఁడితఁడు
చ. 2:
భవములణఁచు యదుపతి యితఁడు
భువనములిన్నిటికిఁ బొడవితఁడు
దివికి దివమైన తిరమితఁడు
పవనసుతు నేలినపతి యితఁడు
చ. 3:
గరుడని మీఁదటి ఘనుఁడితఁడు
సిరులిందరికి నిచ్చే చెలువితఁడు
తిరువేంకటనగము దేవుఁడితఁడు
పరమపదమునకుఁ బ్రభుఁడితఁడు