ఈ పుట అచ్చుదిద్దబడ్డది
రేకు: 9019-01 శ్రీరాగం సం: 04-538 వేంకటగానం
పల్లవి:
కప్పురమునకుఁ గప్పురమై
చిప్పిలుఁదావి మించె నితఁడు
చ. 1:
బంగారమునకు బంగారమై
శృంగార మమరె శ్రీ హరికి
అంగమయిన మొల పీతాంబరంబున
కొంగు బంగారై కూడె నితఁడు
చ. 2:
తట్టు పుణుఁగునకుఁ దట్టు పుణుఁగయి
ఘట్టిమేన మించెఁగా యితఁడు
నెట్టన నొసల నిండిన కస్తురి
బొట్టు చెమటతోఁ బొలెనికతఁడు
చ. 3:
పన్నీట పాదాన పన్నీరే తానయి
యిన్నిట శ్రీ వేంకటేశుఁడిదే
ఉన్నతి జలధి నుదయమున
కన్నియ కౌఁగిట ఘనుఁడితఁడు