ఈ పుట అచ్చుదిద్దబడ్డది
రేకు: 0003-6 ముఖారి సం: 05-017
పల్లవి:
ఇదిగాక సౌభాగ్య మిదిగాక తపము మఱి
యిదిగాక వైభవంబిఁక నొకటి కలదా
చ. 1:
అతివ జన్మము సఫలమై పరమయోగివలె-
నితర మోహపేక్షలిన్నియును విడిచె
సతికోరికలు మహశాంతమై యిదె చూడ
సతత విజ్ఞాన వాసనవోలె నుండె
చ. 2:
తరుణి హృదయము కృతార్ధతఁ బొంది విభుమీఁది
పరవశానంద సంపదకు నిరవాయ
సరసిజానన మనోజయమంది యింతలో
సరిలేక మనసు నిశ్చల భావమాయ
చ. 3:
శ్రీవేంకటేశ్వరుని జింతించి పరతత్వ-
భావంబు నిజముగా బట్టెఁ జెలియాత్మ
దేవోత్తముని కృపాధీనురాలై యిపుడు
లావణ్యవతికి నుల్లంబు దిరమాయ